Zothlifim Logo
Loading ...

Nimin khan ZPM Legislature Party-a MLA parukte chuan Serchhip Biala MLA by-election neih tur chungchangah Serchhipa thuthar thehdarhtute an kâwm.

Nimina Serchhip Press Club-a thuthar thehdarhtute an kawmnaah hian ZPM Legislature Party Leader thar Vanlalhlana chuan Serchhip bial by-election neih tura ZPM party hminga ding tur, Lalduhoma campaign-pui tura lo kal an nih thu a sawi a, MLA aṭanga Lalduhoma bân a ni chuan Mizoram mipui a barakhaih a, an khawngaih bawk niin a sawi a, Serchhip bialtu MLA atana Lalduhoma thlang tlingtu mipuite duhthlanna an zah thu leh an lainat thu a sawi a. Dik taka sawrkar a kal theihna turte, sawrkar sum dik tak leh ṭha taka hman a nih theihna tur leh, sawrkar project leh scheme hrang hrangte dik tak leh chak taka kalpui a nih theih nan ram rorelnaah opposition chak tak neih a ngai tih an sawi a, sawrkar khalh ngil tura thawh hlâwk ber Lalduhoma MLA aṭanga paihthlak a ni chu pawi an tih thu sawiin, Zoram mipuiah sawrkar hian opposition chak neih hi a hlau em ni? tih zawhna a lian hle nia sawiin, Lalduhoma kaihhruaina hnuaiah opposition party-te chu sawrkar khalh ngil tura ṭha tawka an hriat thu leh, ram tana rawng a bawl zui zel theihna turin MLA a nih leh ngei ṭul an tih thu sawiin, hei vang hian Serchhip bial mipuite chu Lalduhoma thlang tling leh ngei turin an ngen tih a sawi.

ZPM Legislature Party MLA-te chuan zawhna chhângin anmahni Independent MLA nimahse MLA an nih theihna turin ZPM party-in an thehchhuah thu leh ZPM party hminga tling an ni tih an sawi a, dânin a phal chin zelah ZPM party chu an thurualpui zel dawn tih an sawi a, MLA aṭanga bân a nih theih nana Lalduhoma hêktute pawh an khawngaih hle tih sawiin, an hêktute pawhin hrehawm an ti a, mahse nawrtu an awm avang-in an ti lo ngam si lo niin an sawi a, Serchhipa Lalduhoma thlan tlin leh a nih chuan Serchhip bial chu inthlan leha Chief Minister bial tur chiang sa niin an sawi bawk.

ZPM MLA-te chuan Lalduhoma chuan a bial a hmangaih a, Serchhip bial chhungah hmasawnna hrang hrang a thlen theih nan sawrkar department hrang hrangte dawr kualin chak takin hma a la a, tun hnaiah Serchhip bial chhunga hmasawnna hrang hrang thleng mek chu Lalduhoma’n a bial chhung tana hma a lakna rah niin an sawi bawk.

Mizorama sawrkarna lo siam tawh political party-ten mipuiah vote zawn nan sem policy an inzawrhsiak tih an sawi a, hei hian mipui rilru a tichhe mek zel tih sawiin, ZPM Legislature party chuan Zoram mipuiin an thawhrimna hmanga hlawhtlinna tluantling an neih theihna tura hma an lak zel tur thu an sawi a, sum leh therhlo dang hmanga vote hlu tak inleisak tumna chu mihring inzahlohna lian tak a ni tiin, Serchhip bial MLA by-election neih turah pawh vote lei tumtu politician-te chu ram tichhetute an ni tih hria a, huai taka hnâwl ngam turin Serchhip mipuite an chah a ni.

Nimina thuthar lakhawmtute an kawmnaah hian ZPM Legislature party leader Van-lalhlana bakah Dr. Vanlalthlana, VL Zaithanzama, Lalchhuan-thanga, C.Lalsawivunga leh Andrew H Thanglianate an tel a, thuthar lakhawmtute an kawm zawh hian Serchhipa thlai chinna hmunpui Zawlpui phaia hmalakna leh hmalak zel theih dan awmte zirchiangin Zawlpui phai an tlawh nghal a ni.