Civil Hospital Lunglei nau neihna ward aṭangin nausen, ni 4-a upa chu rukbo a ni a, pawi khawihtu hi he thubuatsaih lai thleng hian man a la ni lo.
Thudawnna sawi danin, Tippereghat-a khawsa Dilon Chakma leh Surota Chakma-te fapa, tun thla ni 20-a piang chu nimin, Pathianni zing khawvar hma, zing dar 4 vel khan Lunglei Civil Hospital Maternity Ward Bed no. 13 aṭangin nurse nia inchhal pakhat, damdawi ina thawkte inthuamna anga inthuam chuan up lum ṭhat a ngai tiin, nausen thla khat hnuai lam enkawl ngai zualte dahna hmun, Sick New Borne Care Unit-a dah tur anga sawiin a pawm chhuak niin sawi a ni.
Nausen rubotu nia sawi hian hmaituamna (face mask) a hman avangin nausen nu leh a bula midang awm vete pawh chuan a hmel hi an hre lova, hmeichhia, nu lian lem lo a nih thu an sawi a, nausen mutna khum bul chiaha nau nei tura awm raipuar chuan nausen rubotu hian nausen a pawm chhuah hma hian khuma nausen mu chu a chûlin a khawih vel a, a hnuah SNCU-a dah tur anga insawiin, a ṭul hunah nausen chhungte chu nurse hovin an ko mai tur anga sawiin nausen hi a pawm chhuak niin an sawi a, darkar khat hnuah pawh nurse-ho chuan an koh tak loh avanga an ngaih ṭha lovin SNCU lam an han ngaihven chuan nausen leh a pawm chhuaktu chu hmuh tur an awm ta lo a, nausen latu hian Mizo ṭawng a hmang tih an sawi a, ṭawng a pai lo niin an sawi bawk.
Damdawiina thawktute chuan nausen up ngai hi Ward Duty-ten nau a ṭhat loh chauhin SNCU-a duty te an hriattir a, chumi hnuah an la ṭhin tih an sawi a, tuna nausen rukbo hi zai chhuah nimahse naute pian ṭha, harsatna engmah nei lo niin an sawi bawk.
Naute bo chungchangah hian Lunglei Police station-ah FIR thehluh niin, Lunglei Police-te chuan rang taka hma la nghalin, CCTV aṭanga an en pawhin rinhlelh tur mumal an nei rih lo tih Lunglei SP Stephan Lalrinawma chuan a sawi a, District ṭhenawm Police Station-te hriattir nghalin Lunglei chhuah khân zawng zawngah duty indahin a theih theih an dap mek tih a sawi a, chanchin buatsaih lai thleng hian rinhlelh man an la awm lo a, CCTV-a a lan dan chuan nausen latu hian thawmhnaw vâr a ha a, a hmel erawh a hmuh theih loh a ni.
Police-te chuan naute bo hi ngo lampang, kg 3 leh gram 700 a rit, sam dum, a kheimit vei lama kutchuk nei a nih thu an sawi a, a chinchang hria leh lo hmu chuan Lunglei Police station phone number 0372-2324390 ah hriattir turin mipui an ngen.