Covid-19 hri danna (vaccine) Prime Minister, Narendra Modi-a’n January ni 16, 2021-a a tlangzarh veleha Mizorama kalpui ve nghal turin engkim inpuahchah fel tawh a ni.
He thu hi nimina Covid-19 hri danna (vaccine) pêk dan tur ngaihtuahtu “State Task Force for COVID-19 Vaccination” ṭhutkhawm vawi hnihna, an Chairman H.Lalengmawia, Commissioner & Secretary, Health & Family Welfare Department hova SAD Conference Hall, MINECO-a neihah sawilan a ni a, meeting-a tarlan a nih dan chuan Vaccine tlangzarh ni hian India ram puma vaccine pekchhuahna hmun (vaccination site) 5000 ah hri danna hi pekchhuah tur a ni a. Mizoramah chuan hemi nia hri danna pek chhuahna tur hmun 4 – Aizawl Civil Hospital, Lunglei Civil Hospital, Kulikawn Sub-District Hospital leh Upper PHC, ITI-ah te kalpui nghal a ni ang.
Sawrkar laipui ruahman danah chuan vaccination site atan hian healthcare facilities hman tur a ni a, school leh hmun dang hman phal a ni lo a. State tinah hian Vaccination Special Site neih tur a ni a, State lianah pahnih neih turin State tenau ah pakhat neih tur a ni a. Heng Special Vaccination Site-ah hian Video Conferencing system dah tur a ni a, sawrkar laipui nen inthlunzawmin a ṭul hun apianga inbepawp reng theih turin an inpeih tur a ni.
Sawrkar laipuiin ruahman-na a siam angin Mizoramah chuan Health Care Workers hovin an dawng hmasa dawn a, a dawng turin mi 14,421 (State Health Care Workers 14,107 leh Central Health Care Workers 314) chhinchhiah tawh an ni a, an zingah hian Doctor leh Nurse bakah damdawiin-a thawktu hrang hrangte leh Ambulance driver-te an tel a. Sawrkar laipuiin Operational Guidelines a duan sa khauh taka kenkawh tur niin, vaccination site-ahte hian room pathum – waiting room, vaccination room leh observation room a awm tur a ni a. |hutna felfai, tui thianghlim in tur a awm tel tur a ni. Vaccine tlangzarh ni hian vaccination site tinah mi 100 hri danna hi pek tur an ni a, January, 2021 chhungin ni 9 chhungin nitin mi 880 Mizoramah hri danna hi pek tur a ni.
Mizorama vaccine pek chhuah tur hi Serum Institute of India siam Covishield hman tur a ni a, a thawhkhatna atan vaccine 18,500 dawn niin, heng zinga 10% (1850) hi thla venga dahṭhat tur a ni a. Vaccine hi dose hniha pek tur niin vaccine dose khatna dawn aṭanga ni 28 hnuah dose hnihna hi pek leh tur an ni a. Vaccine rawn thleng hmasa hi dose hnih tur a nih avangin a thawh khatnaah hian Health Care Workers 8,325-in an dawng thei dawn a, sawrkar laipuiin database kaltlanga an bithliah hovin a tahtawlin an dawng dawn a ni.
Meeting-ah hian Covishield chu uluk taka enchhinna kalpui a nih avangin a him tawk tih tarlan a ni a, vaccine pêk a nih hian mi ṭhenkhatah chuan khawsikte an awm fo ṭhin tih tarlan niin, hetiang an awm a nih pawhin hlauhthawnawm a nih loh thu sawi a ni.
Meeting kaihruaitu H. Lalengmawia chuan India ram state ṭhenkhat zingah Health Care Workers vaccine beneficiary la tifel hlei thei lo an la awm laia kum kalta lama Mizoramin a peihfel thei chu Health Department-a thawk-tute remhriatna leh thawhrim rah a ni tih sawiin, a tifel hmasa zinga an tel thei chu chhuan-awm tak a ni, a ti a, Vaccine pe chhuak tura Mizoram inpuah-chahnate chu lungawithlak a tih thu a sawi bawk.