Khawvel pumpuia hrileng danna damdawi pek chhuah lian tham ber tur “Covid-19 Vaccination Drive” chu Inrinnia Prime Minister Narendra Modi-a’n a hawn hnuah Mizoramah pawh pek chhuah ve nghal a ni a, vawiinah pek chhunzawm an ni dawn a ni.
Aizawl Civil Hospital staff Lalmuanpuii chu chawhma dar 11:12 khan vaccine hi pek a ni a, Mizorama Covishield vaccine la hmasa ber a ni a, Lalmuanpuii chuan vaccine chu mi zawng zawngin an lak theih nan duhsakna a hlan tih a sawi a ni.
Mizoramah chuan Aizawl Civil Hospital, Lunglei Civil Hospital, Zoram Medical College, Kulikawn Sub-District Hospital leh ITI Urban PHC-ahte hemi pual hian hun hman niin Healthcare worker 500-in vaccine hi an dawng a, a thawhkhatna a vaccine dawng tur healthcare worker mi 8000 chuang hi January thla chhunga pek kim vek tur a ni.
Aizawl Civil Hospital Auditorium-a vaccine pek tur puala inkhawm buatsaih ah Health Minister Dr. R.Lal-thangliana chuan Sawrkarin mipui mar dek chung leh mipui aiawh sakhaw hruaitute bakah tlawmngai pawl hruaitute râwn chungin hma a la ṭhin a, heng hmalak-nate mipuiten an thlawp ṭhat avangin dinhmun ṭha takah a ding a ni, a ti a. Covid-19 hrileng dona kawnga theih-tawp chhuahtute zawng zawng chungah leh Zoram mipuite chungah lawmthu a sawi a, inkaihhruaina dan thlahdul hret a nih dawn avang leh vaccine a awm tak avanga inthlahdah tur erawh a ni lova, fimkhur taka awm chhunzawm zel a pawimawh hle a ni,a ti.
Lungleiah chuan Civil Hospital Seminar Hall-ah Covid 19 hri danna pek chhuahna hun hman a ni bawk a, MLA Dr.K.Pachhungan a hmanpui a, Lunglei ah hian vaccine dose 1250 pek a ni a a, Covishield la tur hian Civil Hospital Staff tam tak an inpe a, amaherawh chu dose 100 chauh pek hrih tur a ni.
Mizorama Covid-19 hri danna pek chhoh turah a dawngtu turte chu sawrkar laipuiin inkaihhruaina a rawn siam anga kalpui chhovin vawiinah pek chhunzawm tur a ni dawn a, Covid-19 hri danna pek chungchanga sawrkar thupuangtu Dr Lalzawmi’n a sawi danin Ministry of Health and Family Welfare duhdan angin Co-WIN app-ah hri danna latu turte thunluh sa vek an ni a, heng ho hi healthcare workers te, frontline workers te an ni a, anni dawtah hian kum 50 chung lam te, kum 50 hnuailam natna benvawn neihote chu pek hmasak tur pawl an ni dawn a ni.
Co-WIN app hian a tah-tawlin mitinin an lak theih hun hriattirna a pe dawn a, Co-WIN app-ah hian pin code a zirin, pin code hnuaia thawktute awm hming a lo lang a, automatic-in a indawtin app hian a thlang chhuak dawn a. Dr Lalzawmi chuan Co-Win app a mahni nihna lanna (Identity) upload a ni a, thlan an nih chiah khan anmahni phone number pekah sms an dawng anga, i hun a lo thlen hunah, hri danna lak ni, hun leh hmun tur te hriattirna i dawng dawn a ni” a ti.
Inrinnia hri danna pekte pawh hi sms dawng tawh chauh an ni a, tunah hian Mizoram bikah mi 14,000 chuang he apps-ah hian an inziaklut tawh a, hridanna hi dose 18,500 a lo thleng a, mi pakhat-in dose 2 zel lak tur a ni a, tunah hian a dawngtu tur upload tawh hi a la daih dawn lo a, a bo a bâng awm lova pek theih a nih chuan mi 9,325 daih tura ngaih a nih thu a sawi a. Tunkar aṭang hian district hrang hrangah pek chhuah ṭan a ni dawn a, tun kar hian a daih chin chu pek zawh hman an in beisei thu a sawi.