Siaha District Hospital hawng

Health & Family Welfare Minister Dr.R.Lalthanglianan nimin khan Siaha District Hospital a hawng.

Dr.R.Lalthangliana chuan Covid-19 avangin khawvelah nuai 20 chuangin nunna chân tawhin India ram chhung leh hmarchhak bial ngeiah pawh mi tam takin nunna an chan a, Mizoram ah mi 9 chiah nunna chân an awm a, Pathian malsawm tlaka tih tak zet leh ṭhahnem ngai taka sawrkar leh mipui thawhhona leh Zoram mipui ṭawngṭaina vang a ni a ti.

Mizoram Department hrang hrangah hnathawktu inthlahdah rem ve lo leh tih tak taka thawh ngai leh damlo hmangaihna, lainatna leh dawhtheihna nena thawh ngai Department a nih avangin chutianga thawka mahni hna a inpe turin a chah a ni.

Social Welfare Minister Dr.K.Beichhua, Bialtu MLA ni bawk pawhin thusawiin kum 20 zet an manganna leh an rualawh em em Building thar Siaha-in a nei ta chuan hnuk a tiulh zawk a ti a, hemi building thar nei tur kawng thui leh harsa paltlanga a tak an hmu chu an lawm takzet tih a sawi a ni.

He hunah hian Dr. ZR Thiamsanga, ,MLA leh Vice Chairman, H&FW Board ni bawk pawhin thu a sawi a, Aizawl aṭangin H&FW Deptt. hotu liante an tel bawk.

He District Hospital Building thar hawn tak hi cheng nuai 1592.22 senga sak a ni a, Administrative Building leh Quarter a tel bawk a, Contractor hi F.Sangkunga,Venghlui Aizawl a ni a, ni 16.03.2015 khan sak ṭan niin, ni 6.12.2018 khan sak zawh a ni a, Floor 4 (Basement–110.80Sqm, Ground Floor—921.90Sqm,1st Floor—1097.90Sqm leh 2nd Floor—1106.90Sqm) a awm a ni.

Buliding tharah hian Passenger-cum-Stretcher lift(20 person capacity),Solar Water Heater (6000lire per day),Solar SPV Power Plant (1×40Kwp capacity), AC pali 2tons ṭheuh leh kangmei chhuak hriatna tur (Smoke/Heat Detector) 51 a awm bawk.