PC Laltlansanga’n a lehkha zir tawhna hmunte a tlawh kual

Serchhip biala MLA by-election neih tura INC official candidate tur, PC Laltlansanga chuan nimin khan Serchhip khaw chhunga lehkha a lo zir tawhna hmunte a tlawh kual.

PC Laltlansanga hian nimin khan a seilenna Ser-chhip khawpuia lehkha a lo zir tawhna hmun hrang hrang – Govt Primary School-IV, Hmar Veng; Govt. Middle School, Serchhip Vengchung; Govt JM High School leh Government Serchhip College-te tlawhin zirna ina thawktute nen inkawmhona hun an hmang a.

Inkawmhona hunah hian PC Laltlansanga chuan Serchhipah hian Primary School aṭanga Graduate a nih thleng kalin, Serchhipa zir theih chin chu Serchhipah a zir zo tih a sawi a, Serchhipa zirna inte chu khaw dang nena khaikhin pawhin a ṭha tawk tih sawiin, Mizoram puma zirlai tiṭha zinga lang pha Serchhip aṭangin an lo chhuak fo tawh ṭhin tih a sawi a, zirtirtute leh thawktu dangte chu chhuanawm a tih thu a sawi.

PC Laltlansanga chuan zirlai hruaitu an nih laiin Serchhipa zirna ṭha zawk a awm theih nan theihtawp an lo chhuah tawh ṭhin dante sawiin, a bikin, Govt. Serchhip College-a science zirna a awm theihna atana nasa taka an lo beih tawh dante a sawi a, Serchhip khuaa zirna inte chu eizawnna kawng hrang hranga kal turte tan pawh zirna tlak a ni tih sawiin, Serchhip khuaa zirna inte chuan MLA ni tlak an chherchhuak a ni tih lantir turin thawktute chu a ngen a, tun hma leh tun thleng pawhin Serchhip bial tana ṭhahnem a ngaihna chu a la ngai reng tih sawiin, a theihna chin chinah Serchhip bial ṭhahnem a la ngai chhunzawm zel dawn tih a sawi bawk.