Govt. Serchhip College NSS Monthly Bulletin tlangzarh

Govt Serchhip College NSS Units-in thlakipa tihchhuah tura an ruahman, NSS Bulletin issue hmasa ber chu Principal PC Lalremsiama’n nimin khan an College Smart Class Room-ah a tlangzarh.

NSS monthly Bulletin tlangzarhtu PC Lalrem-siama chuan thusawiin zirlai kal khawmte chu taima taka an zirlai zir ṭheuh turin a fuih a, tumna tak tak nei a, taima taka zir ṭhinte chuan hlawhtlinna an chang ngei ngei ṭhin a ni a ti.

He hun hman hi C.Lalramliana PO, NSS-in kaihruaiin, kum 1976 aṭanga NSS Units lo awm tawhna Govt Serchhip College-ah College activities leh NSS activities hrang hrang ziaka dahṭhatna newspaper emaw Bulletin ang chi a la awm ngai lo tih sawiin, tuna Bulletin tihchhuah chu College activities hrang hrang ziaka dahṭhatna atana hman tum a nih thu a sawi.

Thusawitu dang K.Lalrinchhana, Assistant Professor chuan NSS Bulletin tihchhuah a ni chu hmasawnna ropui tak a nih thu sawiin, zirlaite chu mi article ziah te, lehkhabu an ziahte chhiar taima hle turin a chah bawk a ni.

He Bulletin hi phek 4 niin, Colour-a tihchhuah ṭhin tur a ni a, zirlaite hnenah a thlawna sem ṭhin tur niin, soft copy leh hard copy-a tih-chhhuah a ni ṭhin dawn a ni.

Leave a Reply

This site uses Akismet to reduce spam. Learn how your comment data is processed.