Hri kai pahnih hmuhchhuah belh leh

Nimin khan Serchhip District-ah Covid-19 hri kai mi pahnih hmuhchhuah belh leh an ni.

Nimin khan Serchhipa hri kai leh kai lohna enna hmunah RAgT-a sample test 76 leh TrueNAT laboratory-a sample test 18 aṭangin Covid-19 hri kai pakhat ve ve hmuh belh leh a ni a, nimina Serchhipa hri kai hmuhchhuah belh lehte hi Serchhip Bazar Venga cheng, hmeichhia kum 15 mi leh Chhingchhipa mi, mipa kum 1 mite an ni a, hri kai aṭanga kaichhawng ve ve niin, an taksaa natna lang chhuak ve ve an ni.

Heti hian Serchhip District-a Covid-19 hri kai enkawlna, Nursing School (CCC)-ah hri kai enkawl lai 15 awmin, in lama enkawl lai (Home isolation) pakhat a awm bawk a, mahni ina inkhung hrang mek (Home Quarantine) 116 an awm mek bawk a ni.

Hetihlai hian niminpiah khan Mizoram pumah hri kai mi 73 hmuhchhuah thar niin, ZMC RT-PCR laboratory-a sample test zingah COVID-19 positive 12 hmuhchhuah a ni a, TrueNAT laboratory-a sample test zingah positive 5 an awm a, Rapid Antigen Test hmanga COVID-19 positive hmuhchhuah thar 56 an awm bawk a ni.

Nimin khan Mizorama hri kai enkawlna hmun hrang hrang aṭangin enkawl dam mi 24 an chhuak a, tun dinhmunah Mizorama hri kai hmuhchhuah tawh zawng zawng hi 5158 niin, heng zinga mi 4600-te hi enkawl dam an ni tawh a, tunah hian hri kai enkawl mek mi 546 an awm a ni.

Leave a Reply

This site uses Akismet to reduce spam. Learn how your comment data is processed.