Kângmei chhuak leh

Inrinni aṭanga Serchhip khawpui leh a chhehvela ram kâng chu Pathianni zan khan ṭhelhmih fel a nih hnuah nimin chawhma lam khan Serchhip leh Thenzawl inkar, Thuhruk leh Zehtet vel ram nasa takin a kâng leh.

Nimina ram kâng ṭhelh tur hian chhun dar 12 velah mipui inauhkhawm a ni a, ram kang hi Fire & Emergency Services leh a ram neitu Vengchung VC-te hriiattir nghal niin, ṭhelh tumin kangmei chhuahna hmun hi pan nghal ni mahse kangmei hian kawngpui chhak lam a kan kai hman avangin kangmei ṭhelh hna a hautakin a sawt lo hle a, nizana he thu buatsaih lai thleng hian he lai kangmei chhuak hi ṭhelh mih kim a la ni lo a ni.

Hetihrual hian nizan khan Serchhip Dinthar VC huamchhunga mi, Sabual ram a kang leh a, nizan khan kangmei ṭhelh hna hi mi tlawmngaiten an thawk chhunzawm zel a ni.

Nimin vek khan Serchhip District-a khaw dangahte pawh kângmei chhuak vangin an buai hle a, Chhiahtlangah pawh nimin zing kar khan Mulen ram kâng ṭhelhin an chhuak leh a, helai hi Pathiannia ṭhelh mih tawh, rawn kang chhuak leh a ni a, harsa lutuk lovin an ṭhelh mit thei a ni.

Thinglian Mauhak ram, Hmunzawl nen an inkar, kar kalta Nilaini aṭanga kang chu nimin, a ni 6 ni thleng pawh khan an la ṭhelh mit thei lova, Khaw chhunga mei lut tur erawh an veng hneh hram a, anmahni ṭanpuia thlamuan turin Serchhip aṭangin police leh forest deptt staff-te chu ei in tur enge-mawzât kengin an kal a, zan an riak ang. Mei hi a mih hma chu tunkar chhung an khaw mipuiten kang ṭhelh hun atan hman an la tum a ni.

Thinglian khaw ṭhenawm Hmunzawl ram kang pawh a la kal zel bawk a, an mei lam sialah mei hi a tlang zel a an mangang hle niin thudawn a ni a, Aizawl District huam chhung Maite khuaah pawh ram kang nasa tak awmin, kangmei chhuak ṭhelhin khaw mipui an buai hle bawk a ni.

Leave a Reply

This site uses Akismet to reduce spam. Learn how your comment data is processed.