Lungleiah Indian Air Force Bambi Operation nei

Inrinni zing aṭanga Lungleia kangmei chhuaka Zotlang ram la kang mek chu nimin khan Indian Air Force (IAF) Bambi Operation-in vawi hnih phuh a ni.

Mizoram sawrkarin Indian IAF hnenah ṭanpui a zuk ngen angin, IAF chuan Mi-17V5 helicopter pahnih nimin khan an rawn tir a, Lunglei DC Kulothungan A hova tui lakna leh kangmei ṭhelhna tur hmunte enfiahna neih hmasak a nih hnuah nimin tlai 3:55 – 4:22 inkar khan IAF Helicopter Mi-17V5 chuan Litre 3500 dawng Bambi Bucket hmang-in Zotlang ram kang mek ṭhelh tumin ṭum hnih tui a phuh a, nimin atan chuan operation hi tihtawp phawt a ni a, Lungleia kangmei hi 90% aia tam ṭhelh mit tawh nia chhut niin, Bambi operation hi vawiinah a la ṭul a nih chuan chhunzawm leh a ni ang a, IAF team, mi 8-te hi nizan khan Lungleiah an riak a ni.

Addl. Principal Chief Conservator of Forests Key-iekhrie Kire report danin Forest Survey of India (FSI) Satellite aṭanga a lan dan chuan Lungleia kangmei chhuak avangin Pathianni tlai thleng khan ram 427.88 hectare a zau a kang tawh a ni.