Central team-in ZMC-a Covid-19 veite enkawl dan enfiah

Mizoram Covid-19 dinhmun zirchiang tura Mizoram rawn tlawhtu Central Multi Disciplinary team chuan nimin khan Zoram Medical College Falkawn tlawhin ZMC-a Covid-19 hri kai damlote enkawl dan kalphungte an enfiah.

Liaison Officer Dr Zorinsangi sawi danin Central Multi Disciplinary team hian ZMC-a ICU-a inen-kawl dante bakah Oxygen siamna hmunte an enfiah a, ZMC-a Medical Superintendent, Dr. HC Laldina leh a thawhpuite kâwmin hna-thawktu hrang hrangte nen an dinhmun leh hnathawh dante an sawihopui a, heng bakah hian Covid Laboratory test centre-te hnathawh dan an endik bawk a ni.

Central Multi Disciplinary team member te hi Dr. Vinita Gupta, Epidemiologist leh Dr. Shiva Kumar Chimtla, Chest physician-te an ni a, Covid vei hnuchhui ngai buaipuitu Contact Tracing Team-te pawh an kawm bawk a ni.

Central Team te hian niminpiah khan Health & Family Welfare Minister Dr. R. Lalthangliana chu a pisa ah an kawm a, Mizoramin hripui leng dona kawnga hma a lakna kawng hrang hrang sample test, contact tracing, containment zone kalpui dan, COVID Appropriate Behaviour, Damdawi in hrang hrangte inbuatsaih dan leh thil pawimawh dangte an zirchiang ang a, an thil hmuh leh zirchianna atanga rawtna an neihte sawrkar laipuiah an thlen bakah an haw thlak leh hmain sawrkar official pawimawhte nen an sawiho bawk ang.

Health Minister Dr. R. Lalthangliana chuan an zirchianna chuan Mizoramin hripui a dona kawnga awmzia a neih ngei leh a tangkaipui ngei a rin thu a sawi a ni.

This site uses Akismet to reduce spam. Learn how your comment data is processed.