Nimin khan Health Minister Dr.R.Lalthangliana hovin SAD Conference Hall, MINECO-ah Mizorama Covid-19 hri kaite enkawlna hmun aṭanga chhuahtir dan tur chungchang sawiho a ni.
Nimin meetingah hian July ni 13, 2021-a Mizoram daktawr thiam rualte inrawn-khawmna Joint Consultation Meeting an neiha Covid-19 hri kaite enkawlna hmuna chhuahtir hun leh chhuahtir dan tur chungchanga rawtna an siamte sawiho a ni a, rawtna tharah chuan India ram hmun dang ang leh khawvel ram hrang hranga an kalpui angin natna lang chhuak lo (asymptomatic) leh natna lang chhuak nasa lote (mild symptomatic) zingah natna hrik hmuh-chhuah a nih aṭanga ni 10 chhung uluk taka vil an ni ang a, hemi hun chhunga a tawp lam ni 3 (ni 7 – 10 inkar) khawsik an neih loh chuan ni 10-naah test tawh lovin chhuahtir (discharged) an ni ang a, mahni in lamah uluk taka inchik chungin nunphung pangngai an zawh thei ang. Heng bakah hian discharge chungchangah rawtna chi hrang hrang an siam a, sawrkarin a ṭul angin ruahmanna a siam zui dawn a ni.
Covid-19 hri inkai-chhawnna danchah kawnga hmalak mek chungchangte pawh sawiho a ni a, rawtna hrang hrang ngaihthlak niin, uluk taka sawt zawk leh awmze nei zawka kalpui dan tur ruahman tum a ni.
Nimin meeting-a telte chuan Mizorama Covid-19 hri kaite zingah symptom nei tawh lo leh symptom nei mang lote rei tak tak khung reng chuan anmahniah nasa takin rilru leh hriselna a nghawng tel thei tih an sawi a, Covid-19 hi hri chhuak thar a nih vangin a nihphung chiang taka zir chhoh zel a ni a, a tir lama kan hmuh dan leh hriat dante pawh khawvel ram hrang hrangah mithiamten an zirchiang zel a, a ziarang an hriatchian belh zel avangin hri kaite enkawl dan leh enkawlna hmuna chhuahtir dan te pawh an thlak danglam tih tarlan a ni a, WHO, US,CDC leh Korea CDC leh ram dang tam takin May thla khan scientific evidence an neih tawh aṭangin Covid-19 hri kaite enkawlna hmun aṭanga chhuahtir dan kalphung an thlak a, hemi hnu lawk hian Indian Council of Medical Research (ICMR) pawhin an tidanglam ve bawk tih an sawi a, he kalphung thar hi khawvel ram hrang hrang bakah India ram state zingah Mizoram tih lohn chuan an hman vek tawh thu an sawi a ni.