Supreme Court thuchhuak ang leh sawrkar laipuiin ruahmanna a siam angin, Covid-19 kaihhnawiha nu leh pa chân, naupangte chhawm-dawlna leh hamṭhatna tur hrang hrang ruahman a, Aizawl district bikah hian Covid-19 kaihhnawiha nu/pa chân naupang 46 an awm tawh a ni.
Hemi chungchanga Aizawl district chhunga hetiang vanduaina tawk naupangte chhawmdawl leh enkawl zui an nih theih dan tur ngaihtuah hian nimin khan District Child Protection Committee, Aizawl District chu an chairman, district bawrhsap Dr Lalhriatzuali Ralte, IAS hoin an ṭhutkhawm a. Children Home-a naupangte hamṭhatna tur hrang hrang pawh an ngaihtuah tel a, he ṭhutkhawmah hian Aizawl district chhunga Covid-19 vanga an nu/pa chân zawng zawngte heng ruahmanna an chan theihna tura buaipui dan rel a ni.
Nimin khan Covid vanga nu emaw pa emaw chan, kum 18 hnuailamte chhawmdawlna tur sawrkar laipuiin a ruahman – PM Cares for Children – Empowerment of Covid Affected Children chu Prime minister Narendra Modi chuan a khuh hawng bawk a, vanduaina tawk naupangte chu chhinchhiah vek tura tih niin, kum 18 an tling ve leh PM Cares Fund aṭang hian thlatin stipend an dawn theih dawn bakah kum 23 an tlinin cheng nuai 10 an dawng thei dawn a, a thlawna zirna pek tur an nih bakah higher education atan students loan an la thei ang a, PM cares Fund aṭang hian loan interest hi rulhsak an ni dawn, tih te a ni. Heng bakah hian Ayushman Bharat hnuaiah kum 18 an tlin thlengin health insurance cheng nuai 5 tihsak an ni dawn a ni.