Zothlifim Logo
Loading ...

Lionel Messi chuan a hmaa a hlawh ṭhin chanve hlawha kum 2026 thleng Barcelona-a châm zui a remti.

Kum 34 mi, Messi hian June ni 30-a a contract hman zawh takah khan season khatah £123m a hlawh nia sawi a ni a, June ni 30-a a contract a zawh hnu khan free agent a ni a, tunah hian Copa America khelh zawh chawlh a hmang mek a, a contract thar kimchang hi tihfel a la ni rih lo a, tuna a contract tharah hian kum 2 hnuah Messi hi a duh chuan a chhuah phalsak a ni dawn a ni.

Messi hlawh hi a tam em avangin Barcelona hian contract thar an ziahpui lawk thei lova, an indawr reng hnua an inrem theih chhan hi Messi hian a hlawh 50% laia tihhniam a remtih vang a nih thu tarlan a ni.

Barcelona hian hlawha an insenna tihniam turin hma an lak bakah player langsar lakluhna atan player ṭhenkhat an hralh tawh bawk a ni.

Messi hi Barcelona-a a boss hlui awmna, Manchester City emaw, Paris St-Germain emaw pan tur anga sawi rik a ni a, hemi rual hian amah ngeiin khelh ve a duh tih a sawina, America lamah Major League Soccer lam pan tur anga sawi a ni hman bawk a ni.

Messi hi Barcelona tana goal thun tam ber ni mekin, goal 672 a thun tawh a, La Liga title 10 leh Champions League title pali bakah Copa del Rey title 7 a la tawh a, a mimal pawhin chawimawina engemawzat a dawng tawh a, heng zinga ngaih hlut hlawh ber Ballon d’Or pawh ṭum 6 dawng tawhin, a dawng tam ber record a chelh mek a ni.