Hmarchhak State hrang hranga Congress Thalai President te’n India hmar chhak state ramri-ah buaina chawkchhuaktu leh tipunlun tu berah Assam Chief Minister Himanta Biswa Sarma chu puhin, Assam Chief Minister a nihna aṭanga bang turin an phut.
Nimina thuchhuah inṭawm an siamah Nagaland, Manipur, Arunachal Pradesh, Meghalaya leh Mizoram-a Congress Thalai President te’n tun hma aṭang tawhin Assam sorkar hian a ṭhenawm state te neka police ralthuam leh tharum hmangin vau beh leh a tiralṭi ṭhin a, Assam ramri depa awm mipuite huan thlai tichhiaa, an bungrua leh in leh lo vawi tam an lo tihchhiatsak ṭhin chu tun hnaiah Himanta Biswa Sarma-a’n Assam Chief Minister nihna a chelh aṭangin a zualkai hle niin an sawi.
Hmar chhak state te ralmuanna, inkungkaihna ṭha leh inunauna nghet tak tichhe zawnga Himanta Biswa Sarma chet lakna hian North East Democratic Alliance (NEDA) chu hmar chhak state te inlungrualna leh hmasawnna tana din a nih lohzia a tilang chiang hle niin an sawi a. Chutih laiin, hmar chhaka BJP kaihhruai National Democartics Alliance (NDA) laka politics-a hamṭhatna a duh vang a nih thu an sawi bawk.
Hmarchhak state-ah muanna, remna leh inunauna a awm leh theih nan te, hmar chhak state te inkarah thil duhawm lo a thlen zui tawh loh nan Himanta Biswa Sarma chu Assam Chief Minister nihna zahawm tak chelh zui tlak lo leh a mawh-phurhna a hlenchhuah zawh loh avangin ban ngei turin BJP hotute an an phut tih an sawi a ni.