Nimin khan I&PR Minister Lalruatkima kaihhruaiin I&PR leh electronic media- DD, AIR, LPS leh Zonet aiawhte SAD Conference Hall, MINECO-ah Covid-19 hri lêng dona kawnga electronic media kaltlanga mipui zirtirna kalpui dân tur an rel.
I&PR Minister chuan thu sawiin, Covid-19 dona kawngah nasa lehzuala ṭan lak a ngaihthu sawiin, mipui zirtir leh Covid-19 chung-changa puanzar tur pawi-mawh thilah, sawrkar leh media (print leh electronic)-ten thawhhona tha tak an nei chu lawmawm a tih thu a sawi a, Minister chuan tun dinhmun thlirin Covid-19 hri-leng chungchanga mipui zirtirna chu inhrilh zawh tih a awm theih loh avangin a thara ṭan lak a ngai tak meuh a ni a ti a, sawrkar chauh ring lo a, mahni mawhphurhna hria a, khua leh tui ṭha nihna anga Covid-19 a darh zel loh nana theihtawp chhuah zel tur pawhin minister hian mipuite a sawm bawk a ni.
Meeting-ah hian DD, AIR, LPS leh Zonet aiawhte hnen aṭangin Covid-19 dona kawnga sawrkar hma lakna puanzar leh thehdarh an inpeih reng thu ngaihthlak a nih bakah, thawhho tawhna te thlirletna hun tawi neih a ni.
He meeting-ah hian mipuite zirtirna kawnga hmalakna hrang hrang slogan, video clips leh program awm thei te sawi ho niin, target audience mil-in I&PR Director Lallianpuii hova hmalak ni se tih remtih a ni a, hun remchang hmasa berah ṭhutkhawm leh ni se tih a ni bawk a ni.