MJA-in journalist-te tana inhawng turin sawrkar a beisei

Mizoram Journalists’ Association (MJA) chuan nimin khan Aizawl Press Club-ah General Body Meeting an nei a, hemi hnu hian thuchhuah siamin, MJA chuan ram leh hnam hmasawnna atan te, ram leh hnam tana ṭha tur ang chiah chuan sawrkar an thawhpui zel dawn tih an tarlang a, hetihlai hian sawrkar pawh journalist-te tana inhawng a, journalist-te inhuamna pawh ngaihthlak sak ṭhin turin an beisei tih an tarlang bawk.

Nimina MJA thu-chhuah chuan, Mizorama journalist-te chuan tunhma aṭangin kawng hrang hrangin Mizoram sawrkar leh a hmalakna ṭha taka ṭawiawmin, a thlawp ṭhin tih a tarlang a, hetihlai hian tunhnaiah sawrkar nena thawh dunna ṭha an neih tiṭhuanawp thei thil journalist-te chunga thleng a awm leh zauh ṭhin tih a tarlang a.

Tunhnaia ramria buaina awm chungchanga sawr-karin all political party, kohhran hruaitute leh all NGO-te nena sawikhawm-naah, hun reilote chhung video coverage tih takngial pawh phalsak an ni lo tih an tarlang a, phalsak an nih loh chhan leh phalsak lotu sawichian fak tur awm loa hnar an ni chu MJA chuan hriatthiam har a tih thu leh, tun hma aṭanga rilru thianghlim taka sawrkar a lo thawhpui tawh ṭhinnate ngaihtuah phei chuan na a ti hle tih a tarlang a, sawrkar miten lût turin an sawm leh hnuah journalist-te hi lût duh tawh lo anga sawi a awm a, inkhawm ṭan a nih aṭanga darkar chanve chuang kawngka pawna awm journalist-ten lût tura sawmtu tumah an awm an hriat loh thu, MJA General Body Meeting-ah an sawi a ni.

Sawrkarin inhmuh-khawm a kohin journalist-te chuan chumi chanchin hriat tum chuan theih ang angin an ngaihven ṭhin a, sawm an nih lohnaah pawh chanchinthar hre tura kal hi journalist hna dik tak a ni a, amaherawhchu, tel phalsak an nih lohnaah chuan tel an tum lui tlat ngai bik lo tih an tarlang a.

Ram inrinaa pawm dan inang lo avanga tunhma aṭanga ṭhenawm state nen innawrna lo awm tawh ṭhin chu tunhnaiah tharthawh a ni leh tih tlang hriat a ni a, ṭhenawm state chuan an media-te an hmang ṭangkai thiamin an thawhpui thiam ṭhin hle a. Mizoram lam tih ni miah loah pawh hmingchhe taka chhuah chang a nei ṭhin a, Mizoram sawrkar hotute pawh kan media-te hmang ṭangkai ve turin thurawn pek an ni tawh a, amaherawh chu tun thlengin, media hman ṭangkai tumna tak tak ala awm lo niin a lang tih an tarlang a, Mizoram journalist zingah phai lama national/regional media-a ziak ṭhin correspondent an awm nual a, Mizoram-in a hlawkpui tur zawnga ziak turin, sawrkar hotute biak ṭawng theih an nei ngai lo niin an sawi tih MJA thuchhuah chuan a tarlang a ni.

This site uses Akismet to reduce spam. Learn how your comment data is processed.