Zothlifim Logo
Loading ...

Aizawl khawpui leh a chhehvel hmun ṭhenkhata Covid-19 hri kai leh kai loh endikna (mass testing) runpui neih mekah ni 2 chhunga mi 10,002 test neihah hri kai 366 (3.66%) hmuh a ni)

Nimina SAD Conference Hall, MINECO, Aizawl-a Health Minister Dr. R.Lalthangliana hova Aizawl khawpui leh a chhehvel hmun ṭhenkhata sample test runpui (mass testing) neih mek chungchang sawihona-ah he thu hi sawilan a ni a, he hunah hian Health Minister chuan Total Lockdown puan chhunga Aizawl khawpui leh Mizoram hmun hrang hrangah Covid-19 hri pui inkaichhawnna chhu chat tura theihtawp chhuah-na pakhat atan sample test runpui hi kalpui a nih thu a sawi a, hei hi lockdown kan kalpui chhan ber pawh a ni, a ti a. Sample test kit kan chah a hun taka a rawn thlen theih loh mai kan hlauh laiin Principal Consultant Wing Commdr J.Lalhmingliana’n theihtawp min chhuahpuina avangin Kolkata Airport-a test kit parcel 82 tang reng chu nimin khan parcel 75 rawn thlengin, karleh Thawh-lehniah parcel 7 a rawn thleng leh dawn a, tluang takin hma kan la chhunzawm zel thei dawn a ni, a ti.

Wing Commdr J.Lalhmingliana pawhin tuna delhi Airport-a test kit parcel 100 la tâng pawh chu vawiin-ah Delhi-Aizawl direct flight Indigo Airlines hmangin rawn phurh thlen a nih tur thu a sawi bawk a. May thla tir aṭanga July ni 21, 2021 thlengin thlawhtheihna vawi 58 (May-ah 23, June-ah 17, July 21 thlengin 18) a service tawh thu leh khualzin 7190 (May-ah 2769, June-ah 2488, July 21 thlengin 1993) an rawn luh tawh thu sawiin, khualzin rawn thlawk lut/haw zingah Lengpui Airport Screening Point-ah Covid-19 hri kai mi 118 (May-ah 97, June-ah 8, July 21 thlengin 13) an hmuhchhuah tawh thu a sawi a. Passenger rawn lut zinga 1.64% positive an nih thu leh thlawhtheihna pakhat zelah Covid-19 positive 2.03% hmuchhuah an ni tih sawiin, tun dinhmunah chuan rawn lut lam aiin Mizoram aṭanga zin chhuak-te hi an hlauhawm tawh zawk ang hiala ngaihtuah theih a ni a ti a, Covid-19 dona atana hmanraw mamawhte chatlak lova rawn phurh thlen zung zung a nih theih nan kar khata thlawhtheihna service zat tihpun a ṭul hle nia a hriat thu a sawi a ni.

State Nodal Officer on Covid-19 Dr.Pachuau Lalmalsawma chuan sample test runpuia data-te hi uluk taka ennawn leh a la ṭul tih a sawi a, hei bakah hian sample test zawng zawng srf ID pek a, COWIN portalah thun vek a ngaih avangin result kimchang tarlan hian hun a duh hlek ṭhin tih sawiin, sample runpui test atana volunteers Data Entry Operator 25 leh Laboratory Technician 24 an rawihte chu Team 5-ah an ṭhen thu a sawi a, srf ID generate zung zunga result rang taka siam turin Data Entry Operator volunteer lâk belh an la mamawh dawn tih a sawi a ni.

Sample test runpui neih ṭan aṭanga nimin thleng, ni 3 chhung hian Veng/khua 12 – Armed Veng South, Bawngkawn, Bethlehem Vengthlang, Chhinga Veng, Electric Veng, ITI, Ramthar, Salem veng, Saron Veng, Tuirial, Venghlui leh Ch. Saprawnga truck terminal, Rangvamualahte sample test a ni tih sawiin, vawiin hian Baktawng Tlangnuam (Chhuanthar), Phunchawng, Rangvamual, Sairang leh Sihhmuiah sample test runpui hi neih leh tum a nih thu a sawi.

Meetingah hian ZMC dinhmun pawh tarlan niin, July ni 15 – 22 inkar hian ICU khum 34 awmnaah chawhrualin nitin mi 44 (attendant telin) an awm a, Covid Ward khum 273 awmah hemi hun chhung vek hian nitin damlo 305 (attendant telin) enkawl an ni a, chhuatah te an mut a ngaih thu tarlan a ni.

PM Cares hnuaia Owygen Plant 1000 lpm Central PWD in ZMC a an bun tur pawh kumin August ni 15 hmain peihfel a nih beisei thu tarlan niin, HLL inventilator 10 ZMC a an pek tur pawh a bun tur company engineer chu karleh lamah a rawn kal tur thu tarlan a ni bawk.