India sanaa nimin tlai dar 4:30 khan khawvel Olympics Games 2020 chu Japan khawpui Tokyo-a Stadium sak thar, National Stadium-ah hawn a ni ta.
Nimin tlaia Olympic Games hawnnaah hian Covid-19 hri leng mek avangin a hmunah chhimtu mipui an awm lova, ram hrang hrang aiawhte inlani, International Olympic Committee (IOC) hotupa Thomach Bach leh Tokyo Organising Committee hotupa Seiko Hashimoto-ten thu an sawi a, hemi hnu hian Japanese Emperor Naruhito chuan Olympic Games 2020 chu a hawng a, ennawm entir a nih hnuah Japanese Tennis star Naomi Osaka chuan Olympic meichher chhiin hawnna hun hi a titawp a, tarlan tawh angin hawnna hunah hian ramhruaitu leh official tlemte bak a hmuna chhimtu an awm lo a ni.
Tun ṭum Olympic Games-ah hian Mizo nula chhuanvawr Lalremsiami pawh India Women Hockey Team Striker niin a tel ve a, Remsiami hi Mizo hmeichhe zinga Olympic khel thei hmasa ber niin Youth Olympics leh Asian Games-ah India tan Silver Medal a lo hawn tawh a, vawiin tlai dar 5:15 hian Netherlands hmeichhiate an hmachhawn dawn a ni.
Mizoram Chief Minister Zoramthanga pawhin Olympics Opening Ceremony hi a zinna hmun, Shillong aṭanga lo thlirin, Mizo hockey star Lalremsiami leh India Team-te a ṭan thu leh duhsakna sang ber a hlan thu a sawi a ni.
Aizawl khawpuiah total lockdown puan mek a nih avangin hmun khata punkhawm a theih loh a, hei vang hian Sports Minister Robert Romawia Royte pawhin ama chenna inah enin, India Team a support thu sawiin, Lalremsiami leh Team India duhsakna a hlan a, Mizo mipui zawng zawngte Remsiami leh India Team ṭan turin a sawm bakah ṭawngṭaipui turin a ngen bawk a ni.
Prime Minister Narendra Modi chuan Japan PM Yoshihide Suga leh Japan mipuite chu Tokyo Olympic leh Paralympic atan duhsakna a hlan a, he infiamna hunpuiah hian khawvela infiammi ṭha ber berten an thiamna ropui tak tak an lantir a beisei thu a sawi a ni.