Season liam ta kha Premier League season hnuhnung 11 chhunga Premier League-a English player-te khelh tam ber ṭum a ni.
CIES Football Observatory-in a tarlan danin 2020-21 season chhunga Premier League khelh hun chhung belhkhawm (total minute)-a za-a 38-ah English player-te an khel a, 2010-11 season aṭanga belhkhawm khan English player-te hian 33.8% an khel a ni.
Season liam ta kha season 11 chhunga English under-21 player-te khelh tam ber a ni bawk a, season 11 chhunga English Under-21 te khelh hun rei zawng hi chawhrualin 4.7% a ni a, season liam ta khan 38% an khel a ni.
English player-te khelh tam hian ram inelna lamah pawh national team-ah hmasawnna ṭha tak a thlen niin a lang a ni.
Football Association chairman Greg Dyke chuan kum 2013 khan England-in 2022 World Cup an chawi theihna atan tiin English player-te khelh tamtir dan a lo ngaihtuah a, season liam taah nasa takin English player-te khelh chhung a pung a, England chuan a vawi khatna atan European championship final an thleng ta nge nge a ni.
Hetihlai hian England hian hmasawn an la ngai hle a, Spain-ah chuan Spanish player khelh chhung belhkhawm hi 60.6% niin, France-ah 51.9% leh Germany-ah 40.8% a ni a, hetihlai hian Italy erawh an percentage a hniam ber a, 35.3% a nih laiin Euro 2020-ah an champion thung a ni.