Mizoram State Health Care Society Chief Executive Officer Dr.Biakthan-sangi chuan State Health Care Scheme hnuaiah bill tang ṭhen rih mahse bill thehlut tawhten an hmu ngei dawn a, hlauhthawnna tur a awmlo a ti.
Dr.Biakthansangi chuan Covid-19 hrileng avanga sawrkar sum harsatna avangin Health Care Scheme-a bill lûtte an pe chhuak zung zung theilo mahse bill la hmu loten an hmuh ngei theih nan sawr-karin a mawhphurhna a hlen chhuak ngei dawn a ti a, Mizoram State Health Care Scheme Policy hman mek chu thla kal ta September-ah a tawp a, kum thar March thla thleng hman turin inziah luh leh hun hawn leh mek a ni tih sawiin, October ni 11 aṭanga bulṭanin, December ni 10 thleng a inziah luh theih a ni a, thla 6 chhung hman tur niin, BPL tan Rs.50/- leh APL tan Rs.500/- inziah luh man lâk a ni tih a sawi.
Mipuite inziak lût tura sawmin hmang tangkaia hunbi tiam a pelh hma ngeia inziak lut ngei turin a sawm a, December ni 11 hma-a inziak lutte chu hemi hma October ni 1 hnu lama damdawi inah an awm a nih chuan an bill thei vek dawn tih a sawi bawk.
Dr.Biakthansangi chuan sawrkar laipui duhdan angin kum thar aṭang chuan Mizoram State Health Care Scheme chu sawrkar kum chhiar angin policy khat kalpui a ni tawh dawn tih a sawi a, kum thar 2022 April thla aṭanga a kum leh March 2023 thleng awh tur a ni tawh dawn a, kum thar policy atana inziah luh hun chu February emaw March thla emaw hawn a nih a beisei tih a sawi.