Lok Sabha MP-in Aizawla BSNL hmun a tlawh

Lok Sabha MP C.Lalrosanga chuan nimin khan Aizawla BSNL hmun tlawhin General Manager Arun Kumar leh a thawhpuiten an lo dawngsawng a, Mizoram chhunga BSNL hnuaia inbiakpawhna lam tihṭhat dan turte a sawipui.

BSNL General Manager chuan 4G khawl thar an neih thuai tur thu sawiin, hei hian inbiakpawhna lam a tihṭhat tur thu leh BSNL hian FTTH hmangtu pawh 8300 lai an neitawh tih a sawi a. Internet tihchangtlunna tura Bangladesh aṭanga Internet Gate Way/Internet Traffic hruipawh hna zawh tawh chu tunah hian enchhin mek a ni tih MP chu a hrilh a ni.

C.Lalrosanga chuan BSNL kaltlanga Mizorama inbiakhmuhna lam tichangtlung tura Mizorama BSNL hotute mamawhte chu an hmunpui lama hotute hnenah thlensak a tum thu a hrilh a ni.

C.Lalrosanga’n BSNL a tlawh-naah hian Telecom Advisory Committee Member H.Vanlalrawna leh HC Vanlalruata-ten an ṭawiawm a ni.

Hemi hnu hian MP C.Lalrosanga chuan Assam Rifles DIG Brigadier Digvijay Singh chu kawmin, Aizawl aṭanga Assam Rifles sawnchhuah dan turte leh Myanmar nena inrina hrula Assam Rifles-hote hnathawh dante a sawipui bawk a ni.

Leave a Reply

This site uses Akismet to reduce spam. Learn how your comment data is processed.