Hranghlui zaithiam, Radio Artist Ngurliana Sailo chu nimin zing khan Covid-19 vangin ZMC-ah a thi, kum 70 mi a ni.
Ngurliana Sailo hi Reiek Lal hnuhnung ber Laltluanga Sailo leh Lalsangliani Sailo te inkarah kum 1951 November ni 30 khan Reiek khuaah a piang a, Aizawl College aṭangin PU a pass a hnuah kum 1972-ah Scaleman-ah a lut a, LDC-ah kaisangin hmun hran hranah a thawhkual hnuah Reiek RD Block-a a thawh laiin UDC-ah kaisangin kum 2014 November-ah a pension a ni.
Hla phuah bakah rimawi leh zai lamah a tui hle a. Kum 1966 vela a tlangval chhuah ṭan laiin hla a phuah ṭan a, lengzem hla 20 vel a phuah a, kum 1971 vel aṭangin zai lamah a lar chho ṭan a. A hla phuahte zingah ‘ST Mangtha’, ‘Beisena’ leh ‘Darbiahnemi’ tih te chu a lar pawl a ni. All India Radio Aizawl Station-ah kum 1971-ah hla khung tanin hla 67 a khung a, B High Artist a ni.
Covid-19 hri a kai avangin November ni ni 1 khan an khua Reiek 3C-ah a lut a, hma a sawn theih loh avangin November ni 26 tlaiah DCHC Mualpui-ah a lut a, 27-ah ZMC ICU-ah dah luh a ni.
Ngurliana Sailo hi nimin tlai khan Reiek Lalluaia Hall-ah vui a ni.