Zothlifim Logo
Loading ...

Chief Minister Zoramthanga, MNF Party president ni bawk chuan SEDP sem turin an inbuatsaih mek tih a sawi a, “Financial Year tharah SEDP ball kan rawn roll tawh dawn. Chhungkaw 50,000/60,000 vel cover kan tum,” tiin Kolasib bialah chhungkaw 1,000-2,000 thlan tur ngaihtuah turin party hruatute chu a hrilh.

He thu hi nimina Kolasib block MNF bultuma an party kum 60 tlin lawmna, Kolasib Diakkawn YMA Hall-a neih a hmanpuinaah Chief Minister hian a sawi a, Chief Minister chuan SEDP-ah chungchang a sawinaah, “Vawi khatah pawisa tam pui, Covid avangin ka pe thei lovang. A sing tel erawh chuan kan pe ang,” a ti a, hetih lai hian SEDP dawng hmasa turah party dang thlan an ni dawn lova ngaih theih turin a sawi a, “Unit tinin in thlan tur lo en ula, in thlan loha ka rin chu Congress member-ho te, ZPM member te, party dang chu a hmasaah inthlan ka ring lova, sawrkar hnathawk pawh a rem vak lovang. Hausa thlan ngai lo chi pawh an awm ang,” tiin SEDP dawngtu turte chu anmahni thiam sa, chhungkuain an duh zawng trade-ah kal mai tur a nih thu a sawi.

MNF president chuan an party-in kum 60 chhungin harsatna tam tak a paltlang tih a sawi a, India ram party lian zingah kum 60 tling an awm mang loh thu leh Mizoram-ah phei chuan an awm loh thu a sawiin, inthlan leh hunah pawh MNF chuan sawrkarna an siam leh dawn niin a sawi a, mipui pawhin sawrkar leh ngei tura an rin ber a nih thu leh tuna MLA bial 27-te chu party dangin lân vek turin a harsat dawn thu a sawi. “ZPM phei chu chhim lamah unit lian an nei lo, Aizawl-ah engemaw zat an nei chauh,” tiin neutral-te pawhin sawrkar chuang lo tur an vote a rin loh thu leh MNF chuan SEDP nen ṭang an la ang a, an sawrkar leh ngei dawn tih a sawi.

Diamond Jubilee lawmna inkhawmah hian bialtu MLA K. Lalrinliana, MoS leh Tuirial bialtu MLA K Laldawngliana te pawhin thu an sawi a, Kolasib bial chhunga MNF zawm thar voter 887 lawmluh an nih bakah Kolasib-a an party office ‘Hnam Run’ hawn nghal a ni bawk.