Zothlifim Logo
Loading ...

MNF President leh Chief Minister ni bawk, Zoramthanga’n SEDP sem dan tur leh a dawngtu tur thlan dan tur a sawi chuan Zoram mipuite a barakhaih tih ZPM Ṭhalai chuan an sawi.

ZPM Ṭhalai chuan an thuchhuahah chuan an sawrkâr hmaa chhûng tin hnêna SEDP cheng nuai thum aia tlem lo, nuai thum chung lam sem a tiamtu MNF President leh Chief Minister ni bawk Zoram-thanga chuan sawrkârna an chan hnu, ni 28.1.2022-a MNF Diamond Jubilee lawmna, Kolasib Diakkawn YMA Hall-ah, SEDP thlangtu tur chu MNF unit an nih tur thu leh, Congress, ZPM leh party dang chhungkua aṭanga thlan ve an nih a rin loh thu a sawi ta mai chuan Zoram mipuite a barakhaih hle tih an sawi a, mipui sum tam tak chu MNF unit-te’n an nawm an mâka an khawih tur em ni? tih zawtin, SEDP sum chu mipui sum a nih angin, party thliar lovin mi zawng zawng chanpual a ni tih chu an dinna a nih thu an sawi a.

An sawrkar hmaa NLUP dawng tawh zawng zawngte’n SEDP dawng tura tiamtu Zoramthanga chuan sawrkâr kum tharah chhungkaw 50000-60000 vel lek hnena pêk a tum leh si chu anmahni thlang tlingtu mipuite thamlohna lian takah ZPM Ṭhalai chuan an ngai tih sawiin, a lo intiam tawh ang ngeia SEDP chu chhûng tinah cheng nuai thum aia tlêm lo, cheng nuai thum chung lama sem ngei turin an phut tlat tih an sawi bawk.

MNF kaihhruai Mizoram sawrkarin mipui sum hmanga SEDP sem a tum dan chu Zoram dinchhuahna tur ni lovin, Zoram mipui tan hripui lêng kara ram rorelna dik lo avanga ṭah leh ha ṭhialna a ni dawn a, mipui sawrkar ni lo, party sawrkar kalpuitu an nih zia an pholang chiang hle niin an sawi bawk.

BJP Aizawl District pawhin thuchhuah siamin, Chief Minister chuan Kolasiba a thusawinaah, Campaign laia a thusawi chu ṭhiatin cheng nuai 3 aṭanga cheng sing 2/1 emaw chauh, SEDP-a sem tura a tihniam leh ta mai chu mak an tih thu sawiin, hetianga Mizo mipui a thamlo lutuk leh a duh duha tihkawi theih mai mai anga a ngai chu hriatthiam har an tih thu sawiin, state khat hotu lu ber tih atan chuan a zahthlak hlea an ngaih thu an sawi a, an thutiama an rinawmloh zia tilang chiangtu nia an ngaih thu an sawi.

CM berin NLUP dawng tawhte pawhin SEDP an dawn leh tur thu a sawi tawh hnuah, Kolasiba an Party mite hmaa a thusawinaah MNF Party nilo tana SEDP dawn theih a nih loh tur thu a sawi chuan Chief Minister rintlak lo a nihzia a pho langa an ngaih hu leh CM meuhin a sawi tawh chu thu tlinga ngaih a nih laia Mizoram CM thusawi thleng dik awm ngailo chu a hnam ang pawha zahawmna tihbawrhbannaa an ngaih thu an sawi a, Chief Minister zahawmna leh hlutna vawnhim a nih theih nan dawtsawi bansan a, thudik leh thutak chauh Mizoram mipui hrilh a, tiam tawh turin BJP chuan an ngen tih an sawi bawk.