Deprecated: Function is_staging_site is deprecated since version 3.3.0! Use in_safe_mode instead. in /home/lahj9ae7in9c/public_html/wp-includes/functions.php on line 6078
Serchhipah District Bawrhsap hovin Republic Day vawi 73-na hman a ni – Zothlifim
Deprecated: Function is_staging_site is deprecated since version 3.3.0! Use in_safe_mode instead. in /home/lahj9ae7in9c/public_html/wp-includes/functions.php on line 6078
Zothlifim Logo
Loading ...

Nimin khan ramchhung hmun dang rualin Serchhipah pawh DC Office tualah India Republic Day vawi 73-na lawmna hun hman a ni a, Serchhip District Bawrhsap Nazuk Kumar, IAS chu khuallian niin hnam puanzar a pawtpharh.

Zing ni chhuah ruala sawrkar pisa hrang hranga hnam puanzâr zâr a nih hnuah he ni pual thilpekte Serchhip khawpuia Home te, Hospital te leh Jail-ahte hlan an ni a, a lawmna pui ber hi zing dar 9-ah DC Office tualah buatsaih zui a ni.

Khuallian, Nazuk Kumar, IAS chuan thusawiin, kan aiawh tur roreltu thlang ṭhin ram kan nih theihna tura sûlsutu ram hruaitu hmasate leh India danpui duangtu zawng zawngte zahna chibai a buk a, mipuite zalen taka nungin, hmasawnna chak takin a kal reng a, rorelna langtlang, felfai leh huapzo kan neia, kan vannei em em a ni, a ti.

District Bawrhsap chuan Mizoram pawhin chak taka hma lam pan zel a, tun hnai lawka NITI Aayog-in Sustainable Development Goals lama tiṭha state a thlannaah Mizoram dinhmun a ṭha hle a, Serchhip district pawh NE States zinga a tiṭha thlan 10 zingah a lang a ni, a ti.

Tun hnaia Serchhipin hmasawnna tharte a tarlangin, kum kalta chhung-in Police Department-ten case 111 ziaklutin mi 121 an man a, Covid-19 himna dân bawhchhia mi 585 an chawitir a ni. Nausen thihna (Infant Mortality Rate) hi kum kalta chhungin 13.15 a ni a, report thehluh ni thlengin Covid-19 hri kai mi 8068 awmin, mi 24-in nunna an chân a ni.

District chhungah Job Card 15,466 awmin, tun sawrkar kum kal mekah ni 85 inhlawhna siam tawh a ni tih a sawi bawk.

Kumin January thla tir khan Govt. Serchhip College chuan NAAC Accredited A Grade a hmu a, state sawrkar enkawl College zinga A Grade hmu awm-chhun a ni rih tih a sawi a, tun kum kal laiah Jal Jeevan Mission aṭangin khaw 22-ah hmalakna kalpui mek a ni a, kum hmasaah khaw 7 tan kalpui a lo ni tawh bawk.

PMGSY kawng hi tunhnaiah khaw 2-ah thawh zawh thar a ni a, khaw 5 kawng laih mek a ni bawk a, Bukpui leh Khawzawl inkar Electric hrui lian 132 Kv Line thlun thar hna tawh zawh a ni bawk a, he line hian Zuangtui leh Bukpui inkara line fel lo a awm changa harsatna kan lo tawh ṭhinte kha nasa takin a ṭanpui thei dawn a ni.

Kum 2019-20 chhung khan Serchhip district ah Vaimim Metric ton 3167 tharchhuah a ni a, loneitute hnen aṭangin Agriculture Department chuan lei khawlin, AH & Vety Department-ah ran chaw atan a hralh chhawng leh a, tun hnaiah leilet tihzauh hna khaw 5-ah thawh zawh niin ran, chaw siamna khawl thar bunfel a ni bawk a, nikum December thla aṭang khan ran chawte hi her ṭan niin, tun thlengin tluang taka kalpui a ni. Heng te bakah hian district chhunga hmasawnna hnathawh dang tam tak khuallian hian a tarlang bawk.

He hunah hian kum kalta chhunga faina inelnaa lawmman latute hnenah khuallian hian lawmman a hlan nghal a ni.

Hripui laka himna dânin a phût angin he hunah hian sawm bik mi tlem te – Head of Office te, NGO hruaitu te, Media mite leh fai intihsiaka lawmman dawngtute an tel a ni.

Fai inelnaa lawmman dawngtute-
School:
1st – Little Flower Convent School
2nd – Govt. PCR High School
3rd – Chawngbuangi Memorial School
Office:
1st – District Agriculture Office
2nd – District Co-operative Office
3rd – DIET Serchhip
Hospital:
1st – District Veterinary Hospital
2nd – District Hospital
3rd – Mercy Hospital
Hotel:
1st – KH Hotel, Serchhip Bazar
2nd – Hill View Guest House, New Serchhip
3rd – Jamela Hotel, Serchhip Bazar
Village Council:
1st – Chanmari VC
2nd – Hmarveng VC
3rd – Chhiahtlang North VC
Market:
1st – New Serchhip Market Association
2nd – Serchhip Market Association