Zothlifim Logo
Loading ...

Thenzawla Doctor awm mek pathum zinga pakhat sawrkar in sawnchhuah a tum dodalna leh duhlohna lantir nan nimin chawhnu dar 2:30 khan Thenzawl Joint YMA bultumin, NGO hrang hrangten Thenzawl Field Veng kawnah Doctor transfer order copy an hâl.

Thenzawl Community Health Centre (CHC)-a Doctor pahnih awm mek zinga pakhat zawk chu ni 25.1.2022 khan sawrkar chuan Sialhawk-ah sawnin, PTS Thenzawl a Doctor pakhat chu Thenzawl CHC-ah hian dahin, PTS nena hmui tura tih a ni a, hetianga Doctor an neihsa a chân zawnga sawn chhuah an duh loh thu leh an dodal thu hi Thenzawl Joint YMA te chuan thuchhuah an siam a, hemi hnu hian Joint VC leh rulling Block MNF te hmalaknain sawrkar chuan ni 28.1.2022 khan order thar siamin, PTS Thenzawla Doctor awmlai chu Sialhawk PHC a awm tura tiin, Thenzawl CHC-a Doctor pakhat zawk chu PTS hmui turin tih a ni leh a.

Hemi chungchangah hian Thenzawl Joint YMA huaihawtin Inrinni zan khan Thenzawl khawchhunga NGO hrang hrang – Area MUP, Joint MHIP, MZP Sub-Hqrs, MSU Sub-Hqrs leh YMA Branch hrang hrang aiawhten Joint Meeting neiin, khawtlang hruaituten ngenna an thehluh hnuah pawh an beisei ang ni lova, Thenzawl aṭanga Doctor sawn chhuahna Order a la awm tho chu hriatthiam harsa an ti takzet tih sawiin, Thenzawla Doctor awmsaa thlâkna tur dah lova sawnchhuah tumna chu a tawp thlenga dodal zel an tum thu puangin, hmalakna hmasa atan nimin tlai khan Doctor sawnchhuahna Order chu an hâl a, Mizoram sawrkar chu Thenzawla Doctor awm sawnchhuak lo tura ngenin, an pêk belh thei lo a nih pawhin, a awmsa chu sawn chhuak lo tura an duh thu leh an hmalakna sawrkarin tihlawhtling ngei se an duh thu an sawi a, a hlawhtlin hma chuan hmalakna kalpui zel an tum thu an sawi a ni.