Deprecated: Function is_staging_site is deprecated since version 3.3.0! Use in_safe_mode instead. in /home/lahj9ae7in9c/public_html/wp-includes/functions.php on line 6078
Wine siam phalna tihtawp hlauin Grape chingtute mangang takin an awm mek – Zothlifim
Deprecated: Function is_staging_site is deprecated since version 3.3.0! Use in_safe_mode instead. in /home/lahj9ae7in9c/public_html/wp-includes/functions.php on line 6078
Zothlifim Logo
Loading ...

The Mizoram Liquor (Prohibition) Draft Rules 2020 siam turah Study Committee-in MLP Rules-ah wine siam phalna telh loh nise tia an rel mek laiin, tun dinhmunah Champhai leh Hnahlan winery-ah grape tui sawrsa, grape wine-a siam tur litre nuai 2 chuang a awm mek a, Champhai leh Hnahlana grape chingtute mangang takin an awm mek niin thulakna chuan a tarlang.

Champhai leh Hnahlan Grape Growers’ Society hruaitute chuan MLP Rules-ah wine siam phalna telh a nih loh chuan an tan chem lova lu lâkna a ni thei hial dawn tih an sawi a, Council of Ministers thutlukna siam turah beiseina sâng tak an la neih thu leh, chumi a zira hmalakna kalpui zel an tum thu an sawi.

Champhai Grape Growers’ Society hruaitute sawi danin, an society-ah member 140 vel an awm mek a, chung mite tharchhuah grape rah chu kg khat ₹50/- zelin nikum chhung khan quintals 1,050 an leisak a, kum 2020 khan quintal 1,140 an lo lei sak tawh bawk.

Tun dinhmunah Champhai winery ah grape tui sawr sa litre 2,20,000 bawr vel a awm mek bakah, hralh theih mai tura siam sa wine case 3,016 a awm mek bawk a ni.

Hnahlan Grape Growers’ & Processing Cooperative Society-ah pawh member 250 vel awm mekin, nikum khan kg khat ₹50/-a leiin quintal 500 vel grape rah an lei a, kum 2020 khan quintal 637 an lo leisak tawh bawk a. An hruaitute chuan MLP Rules a wine siam phalna telh chungchangah tunkar chho hian Chief Minister hmuh an tum dawn niin an sawi.

Kuthnathawk grape chingtute tharchhuah grape rah te chu wine-a siam a nih loh chuan a market-ah harsatna hrang hrang a tam tih Grape Growers’ Society hruaitute chuan sawiin, kuthnathawktute dinhmun hrethiama wine siam phalna MLP Rules-a telh ngei chu an duhthusam a nih thu an sawi bawk.

Champhai Grape Growers’ Society hi kum 2007-ah din a ni a, Hnahlanah hian kum 2004 chho aṭangin hma an la ṭan a, kum 2015-ah Hnahlan Grape Growers’ & Processing Cooperative Society an din a ni.