Zothlifim Logo
Loading ...

Nimin khan SEDP Executive Board chu a vawi khatna atan, Deputy Chief Minister Tawnluia, SEDP Executive Board, Chairman ni bawk kaih-hruaina hnuaiah Conference Hall Assembly Annex Building-ah an ṭhukhawm.

Deputy Chief Minister chuan sawrkar flagship programme SEDP bul ṭan chhoh tawh chu chhunzawm zelin, mimal leh chhungkua-te thleng tur scheme leh prog-ramme sawiho nana Board meeting a vawi khatna atana neih a ni chu lawmawm a tih thu sawiin, SEDP chu mipuite dâwmkânna tur bakah, ram hmasawnna tur atana duan a nih angin zau takin an ngaihdan leh ṭul leh pawimawh nia an hriat leh ngaihte chu sawichhuak turin MLA-te chu a sawm a, Covid hripuiin kum 2 zet min tuam avangin duh anga chakin hma a lak theih loh chu pawi a tih thu sawiin, sawrkarin sum a neih dan ang zelin SEDP chu theihtawp chhuahin, mipui leh ram hmasawnna leh changkanna atan kalpui a ni dawn tih a sawi a, sawrkar kum thar lo awm turah SEDP hmangin chhungkaw 60,000 vel tuam tum a nih thu sawiin, hemi atan hian cheng vaibelchhe 300 bawr vel ruahman a ni dawn a, hei hi a thawh khatna tur a ni dawn a, sum neih dan zirin kalpui zel a ni dawn tih a sawi bawk.

State Planning Board Vice Chairman H.Rammawi, SEDP Executive Board Vice Chairman ni bawk chuan kum 2019 aṭangin SEDP kenkawh leh kalpui dan chungchanga State Planning Board-in hma an lak dânte sawiin, kum 3 chhungin hma lakna hrang hrang awm tawhin, Agriculture, AH & Vety leh Commerce & Industries, Horticulture leh Fisheries Department-te hnuaia beneficiary oriented scheme-te chu lo kalpui tawh a ni, a ti a, mahse hripuiin min nuai avangin sawrkar chu tum angin an kal thei lo tih a sawi a, beneficiary oriented scheme chungchangah pawh duh angin ke an pen chak thei lo tih sawiin, SEDP sum dawng turte chu an account-ah Direct Transfer angin thun a nih tur thu a sawi a ni.

Meeting-ah hian District Level leh Village Level-a SEDP kalpui nana Board/Committee tur ruangâm chungchang te, beneficiary thlan chungchang te, thlai leh trade hrang hrang thlan chungchang te, thlai/thei loneitute chin mek, enge-maw chen an hlawhtlinpui tawh, hlawhltling zawka SEDP hnuaia chhunzawm dân chungchang te, thingtlang leh khawpuia SEDP kalpui dan tur chungchang te, beneficiary-te tuina leh an hlawhtlinpui ngei theih thil ngaih pawimawh chungchangte chu zau takin sawiho a ni a, MLA hrang hrangten an biala SEDP hmalakna atana pawimawh leh ṭul nia an hriatte an sawi a, rawtna hrang hrang an siam tel bawk a ni.

Sawrkarin January ni 31, 2022 khan SEDP Executive Board ruatna leh an mawhphurhna tur chung-changa hriattirna a chhuah a, Deputy Chief Minister chu Chairman-ah ruat niin, State Planning Board Vice Chairman H. Rammawi chu Vice Chairman-ah ruat a ni a, MLA 14 Board Member-ah ruat niin, anni bakah hian Department 10-a Director-te chu Member-ah ruat an ni bawk a, Secretary, Planning & Programme Implementation Department chu Member Secretary atana ruat a ni bawk.

Board mawhphurna tlangpui chu – SEDP project hrang hrang kenkawh leh kalpui te, SEDP Governing Board-in policy a siamte bawhzui leh tihhlawhtlin te, SEDP Governing Board-in sum a ruahmante a hmandan tur duante leh SEDP kalpui dan tur atana ruangâm leh inkaihhruaina hrang hrang siamte a ni.