Nimin khan Bairabi Zophai-ah Assam police-te leh civil mi ṭhahnem tak an rawn lut a, hemi ep tur hian Kolasib District bawrhsap chuan police te pawh inring nghal turin a hrilh chungin Assam police-te hi an kîr zui leh tak avangin boruak sosang a awm zui lo.
Hemi chungchangah hian Kolasib bawrhsap Dr H Lalthlangliana sawidanin Assam police mi 50 vel leh civil mi ṭhahnem tak hi chawhma dar 11 vel khan Zophai area-ah an lût tih report an dawng tih a sawi a, he thu hi an hriat rualin police hotute chu enfiah nghal turin a hrilh tih sawiin, Kolasib bawrhsap chuan Hailakandhi DC pawh phone-a be nghalin, “Inrinni kalta maiah Bairabi-ah kan inbia a, a tu ve ve mahin boruak chhe zawngin thil i ti rih lovang kan ti zo chauh si a, engvangin nge in rawh luh? In in-withdraw loh chuan sipai kan rawn tir ve nghal dawn a, tharumin kan innuai nghal dawn a, nangmahni mawhphurhna a ni ang. Kan ram chhung Zophai-a in rawn lut hrim hrim hi a rem lo. In in-withdraw nghal tur a ni’ tiin ka zu hrilh nghal,” a ti a.
Hailakandi DC Rohan Kumar Jha, IAS chuan Zophai area-ah ram vah a awm thu an hriat vanga lut niin Kolasib DC hi a hrilh a, Kolasib DC chuan enfiah tura chutiang zat mi hring kal a ṭul loh thu hrilh lêtin, sipai an tirh tur thu a hrilh bawk a, hemi hnu hian Hailakandi DC chuan Kolasib DC hi phone hmanga be lehin, an sipaite an in-withdraw fel thu leh, chen ngheh a, buaina leh harsatna siam tuma kal an nih loh thu sawii, thuneitu sang aṭangin enfiah tura tih an nih thu a rawn hrilh a, Kolasib SP Vanlalfaka Ralte pawhin Assam lam hi an in-withdraw thu a report ve nghal niin Kolasib DC chuan a sawi a, “Boruak pawh pangngai takin a kal zui leh a ni,” a ti.
Bairabi khaw mi ṭhahnem tak chuan Zophai-ah lo atan ram zau ang reng tak an vat a, mau chinna atan hman an tum niin thudawn a ni a, tun thlengin ṭin 70 hmun vel vah ni tawhin, ni 2/1 emaw lekah chuan zawhfel mai an inrin thu an sawi.