NEC Fund cheng nuai 359.21 hmanga ruahman, Samthang khaw lu-a Zopui Phul Samthang Nature Park chu nimin khan Champhai District Bawrhsap Maria CT Zuali’n a hawng.
Maria CT Zuali chuan, Samthang khaw bul maia hmun mawi leh nuam tak, Dil mawi tak awm tel bawk khualzinte hip thei tura cheibawl leh siam kawnga hmalak ṭulnate hriain, Mizoram sawrkar kaltlang-in NEC-ah project thlen a ni a, Chief Minister-in a ṭul anga a bawhzuisak avanga hmalakna kalpui a nih thu a sawi a. Eco Park a nih angin a chhungah concrete building ropui tak tak din lovin a hmun mawina leh nawmnate vawnghim chung zela khualzinte tlawh leh chetvelna tura buatsaih mek zel a ni, a ti bawk.
He Park hi sawrkar hriatpui thlapa hawn a nih hma nikum December thla chhungin Rs.90,000/- lai a tlawhtute atanga dawn a nih thu pawh sawiin, khual thlen leh chhâwn kawngah a khaw mipuite tuaihriam chu ngaih pawimawh a ni, a ti.
Zopui Phul Samthang Nature Park hi NEC Project kaltlanga thawh a ni a, nikum April aṭanga ṭan a ni a, a khaw mite tan khual thlen leh ṭul dang inzirtirna training hrang hrang buatsaih mek zel a ni