Nimina Mizo Zirlai Pawl (MZP) Gen. Hqrs. leh College SU hrang hrangte MZP Conference Hall, Aizawl-a ṭhukhawm chuan College class chu offline-a kalpui ngei ni rawh se an ti.
MZP President Lalnun-mawia Pautu kaihhruai ṭhutkhawmnaah hian, College zirlai hruaitu hrang hrang te ngaihdan ngaihthlak a ni a, offline class kal chung-changah hian January ni 19, 2022 khan Mizoram Chief Minister Zoramthang chu a office-ah hmuh a ni tawh a, sawrkar thuneitu hrang hrangte hnenah pawh thlen a nih tawh tih sawilan a ni a, tunah hian Mizoram sawrkar chuan Gym, Spa, Picnic Spot, dawr leh Bazar hawn a phalsak tawh dante, puipunna ṭhenkhat neih phalsak a ni tawh laia College zirlaite hrileng laka fimkhur thiam rual vek tawhte offline-a class kal phalsak a la ni lo tih an sawi a, zirlaite quality pawhin a tuar tawh hle a ni an ti.
Nimina ṭhukhawm chuan sawrkarah Offline class kalpui tura ngen nise, sawrkara ngenna hi March 4 thleng ngaihchan nise, hemi hnua ngenna a la hlawhtlin loh chuan March ni 8, 2022 hian Vanapa Hall kawtah lungawi lohna lantir ni se an ti a, zirlai zawng zawng offline-a class kalpui nise, a theih loh pawhin final semester tal offline class kal tir ni rawh se an ti a, offline class kalpui theih loh a, online-a class kalpui a nih rau rau chuan, MZU hnuaia Degree Course hrang hrang exam pawh online veka kal-pui turin an phut bawk a ni.