Zothlifim Logo
Loading ...

Kumina Mizoram Assembly Budget Session ni 2 neih tawhah eptu member-te chu ṭhutkhawm ṭantirah an la chhuak ve ve a, amaherawhchu nimina a hrana party pahnih committee sâng ṭhukhawm chuan vawiin aṭang chuan session-ah an MLA-te chu session-a ṭhu chhunzawm tawh turin an rel ve ve a, vawiin aṭang chuan eptute member-te pawh Assembly rorelnaah an tel ve leh tawh turah beisei ila.

Assembly Session leh Parliament Session-te hi kan ram kalphung rorel tura kan thlan chhuah, MLA leh MP-ten ram kalphung tur sawihoa ro an relna hun a ni a, chuvangin, democracy ramah chuan he rorelna hun hi a pawimawh em em a, chumi rual chiah chuan session-a rorelnaah hian rorel lai leh eptute member-te pawimawhna hi a inchen reng bawk a, chuvangin, heng rorelna inpuia member-te hian an bial mipuite aiawha ram rorelnaa tel an ni tih an inhriatchian a ṭul a, heng rorelnaa an tel loh chuan, ram kalphung tur relnaah an bial mipuite zawng zawng chu rorelnaah an tel ve ta lo a ni tihna a ni. Chuvangin, an bial mipuiten an aiawh tura heng rorelna hmuna ṭhu tura an thlan tlin hi an ni tih an hriatchian a, he hun hi an ngaih pawimawh a ṭul hle a ni.

Tun ṭum session-ah pawh eptu member-te chu ni hnih ngawt mai rorelna inkhawmah an ṭhu ta lo a, eptu member-te hian house leader lakah ṭhil phut an nei a, an thil phûtte tihhlawhtlinsak an nih loh vangin lungawi lohna lantirna atana Assembly session-ah an tel ta lo a ni a, heng rorela inpuia member-te hian anmahni thlang tlingtu mipuite aiawhtu an nih avangin anmahni duhdan dana awm ngawt hi a rem lo tih hre thar se, hetianga lungawi lohna lantir nana session-a tel loh hi chu tumahin ching zui tawh lo se thil duhawm tak a ni.