Nimina Mizo Zirlai Pawl (MZP) Gen. Hqrs. leh College SU hrang hrangte MZP Conference Hall, Aizawl-a ṭhukhawm chuan College class chu offline-a kalpui an duh thu sawiin, sawrkarah Offline class kalpui tura ngen nise, sawrkara ngenna hi March 4 thleng ngaihchân nise, hemi hnua ngenna a la hlawhtlin loh chuan March ni 8, 2022 hian Vanapa Hall kawtah lungawi lohna lantir ni se an ti a ni.
Kan hriat angin Covid-19 hri leng chuan kum 2 chuang zet chu khawvel nunphung a tibuai tawh a, heta a tuar nasa berte zingah zirlaite hi an tel âwm e. Kum 2 tal tawp chu mahni in lam aṭangin online-in lehkha an zir ta a, hrilen hmaa kum 2 chhunga zirlaiten school an kalna aṭanga thiamna leh hriatna an neih belh zât leh, online-a lehkha an zir aṭanga an hriat belh leh thiamna an neih belh hi khaikhin ta ila a inthlau viauin a rinawm.
Hri leng avanga hunrei tak zirlaite zirna engemawchen a khaihlak hi thil âwm ve reng a ni a, zirlai ni lo, eizawnna hrang hranga eizawngtute pawh an eizawnna kawngah hun engemawchen harsatna tawkin, an kalphung pangngaiin an kal thei lova, nasa takin an tuar ve bawk a ni.
Tunah hian kan state-ah chuan hri lengin ziaawm lam la pan hlei thei lo mahse hri leng avanga inkhuahkhirhna hrang hrangte chu thlahdul niin, mipui nawlpui chuan nunphung pangngai kan zawh leh thei deuhthaw a ni tawh a, chuvangin, zirlaite pawhin an nunphung pangngai an zawh ve leh theih tawh hi thil ṭul tak a ni a, hrileng avanga zirlaite khuahkhirh reng hi zirlaite hmakhua mai bakah, kan ram hmakhua atan thil ṭha lo thlen thei a nih avangin zirlaite pawh an kalphung pangngaiin kal ve leh thei tawh se a duhawm khawp mai.