Ngaizawl kawng laihna tur sum dân kalha laa Assembly Speaker Lalrinliana Sailo puh a nih avanga a kaihhruaina hnuaia ZPM leh Congress member-te Nilainia rorelnaa an tel duh loh hnuah, nimin pawh khan Chief Minister Zoramthanga’n budget a pharhnaah an tel lo leh.

Chief Minister hian house-a thu a sawinaah Budget pharh niah chuan member chu kim taka awm a duh tih sawiin, eptu member-te an chhuak chu pawi a tih thu a sawi a, thudik hriat duh chuan Court lama kal mai a ṭhat zawk thu a sawi.

Hetihlai hian nimin khan Congress leh ZPM party-te hi a hrang ve ve-in party committee sâng an ṭhukhawm a, Congress party chuan an MLA-ten speaker Lalrinliana Sailo chu House hruai tlaka an ngaih loh avangin, Dy. Speaker-in House kaihhruai rih se tia House Leader hnena ngenna an thlen chung pawha House Leader-in Speaker hi a hum tlat avangin, MPCC Political Affairs Committee-in a rel angin, rorelna dik a awm theih nana theihtawp chhuah turin an MLA-te chu Budget session-ah an tel zui leh dawn a ni, an ti.

ZPM Party PAC pawhin House Leader beisei ang ngeiin eirute chhuitu tur leh hrem theitu, Lok Ayukta-ah he thil hi chhuichiang turin ZPM chuan an thlen tawh a, enzui reng an tum tih sawiin, session chu hun pawimawh leh, eptu ten rorelna hmun ngeia sawrkar khalhngil tura an au chhuahna hmun a nih avangin leh, a thlangtu bial mipuite aiawhtu an nih ang ngeiin ni 2 lai an lo chhuahsan chu tawk tawh nia hria-in, an MLA-te chu Budget Session kal meka ṭhu chhunzawm tawh turin a rel ve bawk a ni.