MSU General Headquarters, Aizawl chuan nimin khan thuchhuah siamin, ni 16 February, 2022-a thu chhuah an lo siam tawh angin, Kamrul Laskar chuan dik lo taka Tribal Certificate a neih Surrender tura MSU-in an tih chu sawrkarah a surrender duh tak loh avangin Kamrul Laskar zawn hna an thawk dawn tih an sawi.
MSU Gen. Hqrs. chuan an hnuaia awm, Regional Hqrs., District Hqrs., Hqrs., Sub-Hqrs, Joint Hqrs. leh Branch tinte chu an huam chhung ṭheuhah Kamrul Laskar (Kamlova Chhangte inti) zawn hna thawk turin an hriattir a, MSU Gen. Hqrs, Aizawl aṭanga zawn hna thawk turte chu vawiin chawhma dar 10 hian MSU Pisa Pui, Treasury Square-ah kal tur a ni an ti a, Kamrul Laskar awmna hria chuan an pawl Gen. Secretary Samuel Zoramthanpuia (Ph. No. 8014146640) emaw, Asst. Secretary Laldinsanga (Ph. No. 8413834464)-ah hriattir turin an ngen a ni.