Mizoram Pradesh Congress Committee president Lalsawta chuan “Kan ramah hian mipui an ṭha a, he rama sawrkar ṭha siam loh chhan tur chhuanlam kan nei reng reng lo,” tiin a sawi.
MPCC president leh a thawhpui party hruaitute chuan nimin khan Kolasib an tlawh a, MJA Press Club-a chanchinbu mite an kawmnaah MPCC president chuan mipui tan sawrkar belh tlak neih a ṭul thu a sawi a, tun sawrkar MNF kaihhruai chu nu leh pa chang tlak a nih loh thu a sawi. Sawrkar ṭhaah chuan thil ṭha tih a awlsam a, sawrkar ṭhaah thilsual tih a harsa em em thung tiin, tuna kan awmdanah chuan thilsual tih a awlsam nia a hriat thu a sawi a, “A tisualtute rengin tisual angah an inngai lova, mipui mitmei vênna nei miah lovin anmahni lam pang an rawn inlar chhuak ngam tlat tawh,” a ti a, a rûka kuhva tawlhrûk chungchangah pawh dân lova thiltituten ualau takin an inlâr a, ṭantute hi an zawng emaw tih mai tur a ni a ti.
Ṭhat loh theihlohna bawm tia an tlangaupui chungchang pawh MPCC president chuan a sawi a, Sawrkar kalphung a fel hmasak phawt chuan tumah an ṭha lo thei lo tih a sawi a, sawrkar ṭha chu Mizo mipui-ten an tlin thu a sawi bawk.
He huah hian MPCC vice president Lal Thanzara, party treasurer leh CLP leader ni bawk Zodin-tluanga Ralte bakah MLA pathum – Ngunlianchunga, Lalrindika leh Niharkanti Chakma-ten an ṭawiawm a ni.