Serchhip Mat Phai Tuisen Zau-a MLA Fund hmanga kawng siam thar chu Inrinni khan MJA, Serchhip District Member-te chuan a hmunah tlawhin, an hnathawhte an enpui.
Serchhip Mat Phai-a Tuisen Zau-ah hian C.Khuangawia ram leh Tlangmawia ram inkara kawng, Zote South khaw panna kawng ni bawk chu Fur laiin Mat lui lianin a chim nasat ṭhin avangin lirthei leh mihring tan kaltlang hleih theih a ni ṭhin lova, helai kawng hi kawng awmsa aia sânga sawn turin Serchhip Bialtu MLA Lalduhoma chuan MLA Fund aṭangin cheng nuai 8 a pe a, he sum hmang hian Serchhip Welfare Committee chuan kawng siam hna hi thawkin Inrinni khan an hnathawh hi an zofel thawkhat tih an sawi a, he kawng an laih nan hian helai a ram neitu C.Khuangawia (Dinthar Veng), Tuahkimi (Dinthar Vengsang) leh Tlangmawia (Saron Veng) te chuan sum leh pai engmah beisei lovin an ram an pe tih an sawi a, an chungah an lawm hle tih an sawi bawk.
Helai kawng siam hna thawktute chuan an kawng siam hi meter 800 vel a ni tih sawiin, a sâng laiah chuan kawng hlui aia a sanna hi ft. 10 chuang te a ni tih an sawi a, hei bakah hian kawrte awmna lai zawn kawngte chu furah tuihawkin kawng a tihchhiat loha turin Inrinni khan GSB hmanga chhungin hnatlang an nei bawk.
Helai hmuna ram neitu C.Khuangawia chuan helai hmunah hian tuilian avanga harsatna an tawh ṭhin thu MJA Member-te hnenah hian sawiin, âwm thleng vela tui hian a chim ṭhin thu leh Fur-ah tuilian avanga an kal theih loh ṭhin bakah Ṭhalah pawh kawng diak avangin an thlai thar phurhchhuah kawngah harsatna an tawk ṭhin tih a sawi a, hetianga kawng siam thar a nih hnu hi chuan Fur leh Ṭhalah harsatna tawk tawh lo tura an inngaih thu an sawi bawk.
Helai hmuna hnathawktute chuan helai kawng an laih bakah hian Chawm Kai bula leitan chu an rawthniam bawk tih an sawi a, helai hmun hi ft. 4 vel zeta rawthniam niin, helai kawng hi a nâl avangin ruahtui a tlak hlek chuan lirthei leh kea kal ten harsatna an tawh ṭhin thu an sawi a, hei bakah hian kawng khuar zual hnawh leh siamṭhatna atan Granular Sub Base (GSB) trip 20 (meter 100) chuang zet an hman thu an sawi a, hetianga bialtu MLA in kuthnathawktute tana MLA Fund aṭang sum a ruahman sak chu an lawm hle tih an sawi bawk.
A hmuna tlawhtu MJA member-te pawhin he kawng laihna atana sum an hmuh aṭanga ngaihtuahin an hnathawh chu a ṭha tawk nia an hriat thu an sawi a ni.