Human Resources Development Board Vice-Chairman L.Thangmawia, MLA chuan Mizo Language Development Board (Draft) Bill, 2022 chu Assembly Budget Session karleh a neih turah put luh a nih tur thu nimin khan a pisa ah a sawi.
Mizo Academy of Letters (MAL), Mizo Writer’s Association (MWA), Mizo Grammar Society (MGS) leh Mizo Poetry Society (MPS) hruaitute nen a pisa-a an inkawmhonaah he thu hi sawiin, L.Thangmawia chuan Chief Minister Zoramthanga’n Mizo Ṭawng humhalh leh tihhma-sawn an ngaih pawimawh em avangin sawrkar an din tirh veleh aṭang khan ngaih-tuahna an seng nghal tih a sawi a. Human Resources Development Board Chairman, School Education Minister ni bawk Lalchhandama Ralte kaihhruaina hnuaiah theihtawpin an bawhzui a, Mizo Language Development Board din ṭula an hriat avangin pawl leh mimal ang pawha mithiam engemaw-zat sawmin ṭan an la a, hun leh tha tam tak sen a nih hnuah Assembly-a roreltu sâng berten an pawmpui turin chhawpchhuah a ni dawn ta a ni, a ti a, hemi kawnga ṭan latu leh tha thawhtu pawl hrang hrang MAL, MWA, MGS, MPS bakah sawrkar official-te leh study Team member te, mimal ṭhahnemngai zawng zawngte chungah thinlung takin lawmthu ka sawi a, mahni sum leh pai pawh sêng hreh lova Mizo Ṭawng hum-halh tura an hmalakna chu a thlâwn dawn lo a ni, a ti.
L.Thangmawia chuan Mizo Ṭawng hi Pathianin mal a sawm a, Zofate min phuarkhawmtu a nih bakah Zohnahthlak ten kan inṭawm theih a nih avangin zohnahthlak hmun hrang hranga awmte zingah pawh inthlahrung lovin kan hmang thei a, Mizo Language Development Board kan nei thei a nih ngat chuan a pawimawh hle dawn a, Mizo hnam hrang hrangte min ṭhendarhtu a nih theih rualin min zawmkhawma min thlung khawmtu a nih theih bawk avangin hnathawh kawngah pawh a fimkhur a ngai hle dawn a ni, a ti a. Mizo ṭawng chung-changah a thiamte pawh an inhnial fo a, Mizo ṭawng ziak dan dik chungchangah te, a lam dan dik chungchanahte leh kawng hrang hrangin Mizo ṭawng tihhmasawnna tura thawktu tur a nih avangin mipuite pawhin kan ngaihven a, kan phurpui a ṭul hle a ni, a ti a. Chutih rualin zohnahthlak peng hrang hrangte ṭawng pawh ngaih pawimawh tel a ṭul dawn tih a sawi bawk.
Nimina pawl hrang hrang aiawh kalkhawmte chuan Mizo Language Development Board an nghahlelh thu an sawi a, Mizo ṭawng humhalh leh tihchangtlun zelna tur atan hun thar a in herchhuak dawna an hriatthu sawiin, an phur hle tih an sawi a ni.
L.Thangmawia hian Darchuailova Renthlei lehkhabu ziah “Vankhama : A Master of Diction” leh “Vankhama : Thulehthliah Thiam” chu a tlangzarh nghal bawk a, heng lehkhabute hi kil hrang hrang aṭanga Vankhama hla thlirna a ni.