National Health Mission Employees Union Mizoram (NEUM) chuan sawrkara an thil phûtte chu March ni 3, 2022 hmaa tihlawhtling turin sawrkar hotute an ngen a, a hlawhtlinna an hmu lo a nih chuan hmalak zel dan tur an ngaihtuah tur thu an sawi.
NEUM chuan an harsatna hrang hranga hmalak chhunzawm dan tur chungchang ngaihtuahin nimin khan Executive meeting an nei a, hemi hnua thuchhuah an siamah nikum lama sawrkar hotute hnena NHM staff zawng zawngte Covid-19 hri an kai pawha a thlawna enkawlna dawn an dil sawrkarin a phalsak tawh chunga sawrkar hnuaia Covid-19 damlote enkawlna hmun hrang hranga NHM hnuaia thawktu hri kai enkawlte zingah an inenkawlna senso mahnia intum tura tih an la ni fo ṭhin tih tarlangin, ‘Covid-19 Free Treatment for all NHM staff’ chu a nih dan tur ang taka hman nghal a nih theih an phût tih an sawi.
Tun dinhmunah thla 2 chuang hlawh la thei lovin an awm leh mek tih sawiin, March ni 1 lo awm tur hi thla 3 hlawh an lak lohna tur a ni leh dawn ta tih a sawi a, sawrkar laipui aṭanga sum (fund) lo kal NHM Account-a dah luh kawng-ah tun aia chak zawka tihfel a nih theihna tura hma laksak tur leh kalphung felfai tak siamsak turin sawrkar hotute chu an ngen a, NEUM-ten an harsatna tam tak chinfel a nih theihna tura sawrkarah an thu thlen bawhzui a, thla 3 chhunga report/recommendation peihfela thehlut tura ni 16 August 2021-a study team din chuan thla 6 zet a liam hnuah report/recommendation an peihfel thawkhat tawh nia hriat a nih laiin sawrkarin ni 30 April, 2022 thleng an hun a pawhsei sak nia sawi a awm leh, tun thleng pawha study team report sawrkarin a la dawng lo chu hriatthiam harsa an tih thu sawiin, an harsatna sutkian dan tur fel taka report/recommendation a rang thei ang bera sawrkara thehluh an phut thu an sawi bawk.