Zothlifim Logo
Loading ...

Mizoram Police chuan Online inbumna chungchanga mipuite fimkhur tura chahin, ngenna a tichhuak.

Police thuchhuahah chuan tunhnaiah internet kaltlanga inbumna a hluar hle a, heng inbumna hrang hrang zingah hian Sipai anga inchhal, an thlalak, ID, etc. daha mi bum ching an tam hle tih sawiin, heng mite hian bungraw hrang hrang zuarin, a man an dawn hnuah an bungraw zawrhte a leitu hnen thlen lovin an bibo ṭhin tih an sawi.

Heng mi bum chingte hian sipaiho tana eitur (sangha, sa chi hrang hrang, cake, balhla, etc.) order derin a zuartute an bum ṭhin a, an order man pêkna turin a zuartute hnenah QR Code scan tirin, a zuartute pawisa an lâkchhuahsak ṭhin tih an sawi a, hetianga hriattur pawimawh tak chu kan account a pawisa lo lût turin six (6) digit UPI PIN pek a ngai lova, heng PIN pek ngai titu chuan bum a tum che tih hriattur a ni an ti.

Online kaltlanga sumdawnna (Instagram, Facebook, Whatsapp business) zingah misual ṭhenkhat mi bum tum hrim hrima sumdawnna kalpui an awm mek tih hriat a ṭul tih sawiin, heng sumdawnna kaltlanga bungrua lei/chah hmain a dawr tawhtute comment aṭangin a rintlak nge rintlak loh hriat tum hmasak a ṭul thu te, a dawr neitute leh pawisa pêkna tur account hming/address a inmil em tih hriat hmasak te, bungrua a man pangngai aia tlâwm uchuak lutuk a zawrhte hi inbumna a ni duh hle an ti a, Online dealership, distributorship, etc. pe thei anga insawi tamtak hi inbumna a ni tlangpui an ti bawk.