Mizoram sawrkar hnuaia Department hrang hranga thawk Provisional Employee (PE)-te chuan Mizoram sawrkara a nghet (Regular)-a an luh ve theihna tur tihtawp-sak an nihna tura sawrkar sum hmanna titlem tura sawrkar-in hmalakna a duan (austerity measure) chu hlip turin sawrkar an phût tih an sawi.
Nimin khan PE Association hruaitute hian Aizawl Press Club-ah thuthar lakhawmtute kâwm-in, tunah hian Mizoram sawrkar hnuaia Department hrang hrangah Provisional Employee 8500 vel an awm mek tih an sawi a, Provisional Employee-te dahnghehna tur Regularization Scheme pawh felfai takin sawrkarin a siamsak tih sawiin, hemi hmang hian post ruak awm dan azir leh regularization quota awm dan azirin an nghet ve bek bek zel tih an sawi a, hetihlai hian Finance Department (Economics Affairs) chuan austerity measure tiin, ni 28.5.2020 khan Office Memorandum hmangin PE-te ngheh theih vena awm-chhun chu a tihtawpsak tih an sawi a, hemi hnu kum khat pelh zet hnuah, ni 18.6.2021 khan kum 10 service neite chu seniority-a an hmasak ber dan ang zelin sawrkar chuan regularization a phalsak ve leh tih an sawi a, mahse he relaxation hi mi tam zawkin an chhawr thei chuang lo tih sawiin, a chhan pawh seniority-a pakhatna chu kum 50 aia a upat loh chuan a hnung lama awm, kum 60 tling ṭep tawh pawh ni se seniority-a pakhat-na kum 50 tling lo chuan a dang vek tho tih sawiin, hei hi chu “Saṭahchhuak inpek” ang chauh a ni an ti a, chuvangin “He austerity measure – dan sakei hi a vaia min hlihsak turin sawrkar hi kan phut a ni,” an ti.
PE-te laka austerity measure hman a nih lai hian a nghet a thawk (regular)-te hamṭhatna – Promotion te, financial upgradation – MACP te, time bound promotion-te a titawp ve chuang lo tih an sawi a, hei bakah hian a nghet leh a nghet lova sawrkar hna lak insumkarna a awm chuang lo tih sawiin, mi hnuaihnung zawkte chanvo rahbehna chauh a ni a, sum inrenchem-na tak tak awm chuang si lova hna hnuai hnung zawkte hrêkbeh tlat chu hriatthiam har an tih thu an sawi.
He dan avang hian an ṭhiante tam tak chu kum 60 an tlin tawh avangin an ‘mai par thlawn’ tawh tih an sawi a, chutiang tur chu tam tak an la awm mek bawk tih sawiin, hengte hian an ṭhat lai hun kum 30 chuang teh meuh mai hlawh tlêmte la-in sawrkar tan an hun leh tha an lo thawh tawh tih an sawi a, he Dan Sakei (austerity measure) hi awm lo se chuan an nghet ve thei ang a, chhung-kaw enkawlna tawk chu an nei ve tawh tur a ni, an ti.
He dânin Provisional Employee nawlpuite a nghawng laiin, Austerity Measure hman ṭan ni, ni 25.5.2020 aṭanga ni 31.12.2021 chhung hian sawrkar chuan mi 498 (Group A-76; Gr.B-121; Gr.C–254; Gr.D-47) te appointment a pe tih an sawi a, hetiang thlir chuan Austerity Measure hian hmelhriat leh tihpuitu neite chu a dang ve lo nia sawiin, regularization dan beh mek pawh phelhsak an awm tih a chiang hle tih an sawi a, Provisional Employees Regularisation Scheme chu Finance Department hnuaia Economic Affairs (EA) khawih ni lovin DP&AR khawih a ni a, Finance hian an kuang lo an nawr bakah Council of Minister meeting thu pass palzutna a ni, an ti bawk.