Nimin khan Serchhip District Level Mizoram hmun dang rualin Serchhip DC Conference Hall-ah District Bawrhsap, Nazuk Kumar, IAS chuan ‘Kangmei Vên Hapta, 2022’ a hawng.
District Level Committee on Fire Prevention huai-hawta Kangmei Venna Hapta hawnna hunah hian District Bawrhsap chuan thusawiin, ramngaw chu a chhûnga chêng nunna neite nena inzawm tlat a ni tih sawiin, mihringte pawh chung zinga mi chu kan ni a, Mizote pawh hmanlai ata mamawh chi hrang hrang kan hmuhna leh ramhmul damdawi chena ramngaw hmang ṭangkai ṭhin kan ni a, kan lui leh tuihnate min siamsaktu, kan sik leh sa vawngtu pawi-mawh a ni a ti a, ramngaw tichhetu hlauhawm tak chu ram kâng a ni tiin, kangmei hi thil kan ngaihthah palh hote aṭanga lo chhuak mai thei a nih bawk si avangin Serchhip district mipuite chu ram-ngaw humhalh kawngah te, ram kâng vênna kawngah leh fimkhurna kawngah te thapui thawh thar leh turin mipuite a sawm a ni.
District Bawrhsap chuan sawrkar department hrang hrang te, tlawmngai pawl, chanchinbumite leh khaw-tlang hruaitute pawh thawh-hona ṭha tak nei zel chunga ramngaw humhalh leh kangmei vênna lama ṭan la sauh sauh turin a fuih a, tlawm-ngai pawlte inpêkna avanga Mizoramin thil ṭha tam tak a neih tawh thu sawiin, khaw tina tlawmngai pawlte chu tun aṭanga inbuatsaih a, mahni zâwnah theihtawp chhuah zel turin a ngen a ni.
He hun hi RL Chhuanawma, Honorary Wildlife Warden chuan a kaihruai a, Member Secretary, District Fire Prevention Committee Lalbiakchama Chawngthu, DFO, Thenzawl ni bawk chuan Mizoramin ramngaw a neih dan dinhmun tlangpui sawiin, nikum Forest Survey Report aṭanga tehin Mizoram chu za zela teha ramngaw nei zau ber state kan la ni a, chutihlaiin ngaw chhah (very dense forest) erawh chu za-a 0.74 chauh a nei a, ngaw chhah hi kum tinin kan nei zau chho hret hret a, nikum khan kum dang zawng zawng aiin Mizoramin ram kang kan tuar nasa a, ram kang 4486 zet Forest Department-in an chhinchhiah a, an zinga 205 hi ramngaw kang niin, a dang hi chu Lo hal, Huan hal leh cha halte an ni a ti bawk.
Kawlṭhuama, President, Sub- Headquarters YMA pawhin thu a sawi a, Lalthantluanga, Range Officer, Thenzawl kaihhruaiin kal khawmten ‘Kangmei Ven Thutiam’ sawi rualna hun an hmang bawk.
Kumin Kangmei Ven Hapta thupui atan hian “Kangmei vên hi mitin mawhphurhna a ni” tih chu thlan a ni a, Kangmei Ven Hapta chhung hian inzirtir-na chi hrang hrang kalpui turin District Level Committee chua ruahmanna a siam a ni.