Zothlifim Logo
Loading ...

Serchhip District Bawrhsap Nazuk Kumar, IAS, DDMA Chairman ni bawk chuan Serchhip District chhunga khua/Village Council 18 huamchhung chu February ni 9 – 16, 2022 chhung atan Red Zone-ah nimin khan a puang.

Thupekah chuan Serchhip District chhunga Covid-19 hri darh dan kar khat (ni 1-7.2.2022) chhung Rapid Response Team-in zirchianna neiin, zone classification siam turin rawtna an thlen tih a sawi a, hemi ang hian Red Zone-ah khaw 18 a puang a ni.

Covid-19 Incidence Rate (veng/khua chhunga mi cheng zat aṭanga chhutin, ni 7 chhunga mi 1000 zelah ni 7 chhunga hri kai) mi 10 aia tam neite chu Red Zone-ah puan ṭhin an ni a, nimina Serchhip District-a Red Zone-a puan khua leh Incidence rate chu – Bawktlang (20.71), Buangpui (39.77), Chhiah-tlang Kawn veng (16.98), Chhiahtlang Zotuithiang (Venghlun, Vengchung) (10.03), Chhingchhip Venghlun (Sainik) (27.82), Chhingchhip Venglai (17.35), Field Veng, Serchhip Ramthlun Veng (12.11), Hriangtlang (22.39), Kanghmun South (14.98), N. Vanlaiphai Rahsi Veng (18.46), N.Vanlaiphai Venglai (10.60), Neihloh (42.37), New Serchhip North (15.70), Thenzawl Branch I (Zote Veng, Vengchhak, Venglai) (16.68), Thenzawl Bazar Veng (UPC Veng, Dinthar) (26.01), Thenzawl Field Veng (Electric, Vachadil, Ayush, Ramthar) (27.22) Thenzawl Vengthar (Horti College)(35.05) leh Vengchung, Serchhip (14.28)-te an ni.

Red Zone Veng/Khuaa inkaihhruaina tur pawh thupekah hian a tarlang nghal a, heng hmunahte hian a hranpaa dilna siam ngai lova luh leh chhuah phalsak bik a nei a, Red Zone huam chhunga awm Office-te chu Head of Office-ten inkaihhruaina felfai tak siamin, CAB ṭha taka zawm chungin Office an kal ang a ti.

Heng hmunahte hian mipui punkhawmna leh programme chi hrang hrang – anniversary, birthday, kohhran leh pawl hminga thil tih leh inhmuhkhawm, inkhawm leh hnatlangte khap a ni a, infiamna, ennawm hmunte khâr vek tur a ni a, inneihna leh mitthi vuinaah chuan mi 50 aia tam lo emaw, a hmuna leng zât chanve, a tlêm zawk zawk kalkhawm phal a ni a, he hmuna kalte chuan CAB an zawm ngei tur a ni a ti bawk.

Hnathawktuten an awmchilhna hmunah chuan CAB zawm chungin hnathawh phal a ni a, Bazar hmunte chu khar tur niin, nitin mamawh leh eichawp dawr, damdawi dawr, sa leh thlai zawrhna bazar area pawn lama awmte chu CAB uluk taka zawm chungin nitin hawn phal a ni a, dawr neituten hri invenna SOP chungchangah mawh an phur ang a, dawr nghaktute chuan vaccination certificate an neih chuan pho chhuah theih turin an kawl tur a ni a ti a, anmahni dawrtute chuan mask an vuahin social distancing an zawm ngei theih nan hma an la tur a ni a, a rei lo thei ang ber an indawr tur a ni a ti a, dawr nghaktu leh dawrtuten engtiklai pawhin mask an vuah reng tur a ni tiin, Online shopping leh home delivery-te midang nena intawk lovin a tam thei ang bera kalpui tur a ni a ti bawk.

He thupek hi Police/Executive duty/VLTF-ten khauh takin an kengkawh tur a ni a ti bawk.