Inrinni khan State Executive Committee chuan Covid-19 inkaihhruaina thar (SOP) a tichhuak a, inkhuahkhirhna engemaw zat thlahdul a, hemi bawhzui hian Serchhip District Magistrate, Nazuk Kumar, IAS pawhin Serchhip District chhunga inaihhruaina tur a tichhuak ve nghal.
Ministry of Health & Family Welfare, Govt. of India chuan ni 15.2.2022 khan thuchhuah siamin India ramah Covid-19 din-hmun a lo ziaawm zel thu leh inkhuahkhirhna te tikiam hret hret turin State sawrkar te a hriattir a, Covid-19 dona kawngah hian mihring eizawnna leh mihring nunphung nghawng nasa lo zawnga kalpui turin a hriattir bawk a. Chuvangin, Mizoram chhungah COVID-19 hri darh zel tur venna inkhuahkhirhna awm mek chu inthlahdul hret a ni.
Serchhip District huam chhunga inkaihruaina thar siamah chuan Class X leh XII board exam turte chu School Education Department thuchhuak angin CAB tha taka zawm chungin school leh hostel hawn phal a ni a. Class I atanga IX leh pawl 11 zirlai te tan sikul leh hostel khar a ni ang a, online-in class lak chhunzawm a ni ang. Zirna sawng zawk (higher education) kaina hmun (institute) leh college te chu offline a kal chhunzawm tur a ni.
Biak in-a leng zat chanve (50% seating capacity) aia tam lovin Kohhran Inkhawm pangngai neih phal a ni a, zing leh tlai ṭawngṭai inkhawm pawh phal a ni a, Kohhran Inkhawmpui chhun lamah neih phal a ni a, Inkhawmpui neihna hmun biak in-a leng zat chanve (50% seating capacity) tel phal a ni. Inneih inkhawm leh mitthi vuina a hmuna leng zat chanve phal ani a, ei leh in sem phal a ni lo. Inkhawmah zaikhawm, zaiho leh zaipawl hla sakho te khap a ni.
Picnic spot hawn phal a ni a, movie theatre a hmuna leng zat zatve hawn phal a ni a, Public Park, Swiming Pool leh sahuan hawn phal a ni lo a. Sports Practice indoor & outdoor-ah a hmuna leng zat chanve (50%) aia tam lovin phal a ni a, Sports practice-ah Covid-19 symptom neite an tel tur a ni lo thung a. Sports inelna, tournament te entu awm lovin phal a ni a, Beauty parlour leh Spa hawn phal a ni. Gym leh lumehna dawr inkaihruaina siam zawmin hawn phal a ni a. Mipui pumkhawm khap a ni a, amaherawhchu, sawrkar phalna la-a National/State level programme pawimawhte chu huaihawt phalsak a ni thei ang a, Programme dang pawimawh huaihawt ngai ngei ang chi a awm a nih chuan Deputy Commissioner-ah phalna lak tur a ni.
Trekking, hiking, adventure sports, construction works te phal a ni. Tourist Lodge, Hotel, Home stay leh khualbuk dang te, eichawp dawr, Restaurant, Bazar leh dawr te hawn phal a ni.
Mizoram sawrkar hnuaia Office hnathawktu zawng zawng kal tur a ni a, phalna/dilna la lawk lovin office tlawh/dawr phal a ni lo a, dawr hawn phal a ni a, lirthei pangngai tlan danah khuahkhirhna a awm lo bawk.