Zothlifim Logo
Loading ...

Mamit Bialtu MLA H.Lalzirliana, Road & Infrastructure Development Board Vice Chairman ni bawk chuan Tlawng Lei leh NH44A/108 siam mek chu a hmunah kalin a endik.

Lalzirliana chuan hna-thawktu company-te chu ṭha tak leh chak taka hna thawk turin a chah a, Tlawng lei hi airport panna kawngpui a awm a nih avangin Mizoram luh leh chhuahna kawngpui pawimawh ber pakhat a ni a, lei pawimawh tak a nih thu a sawi a, hun hmasa lamah Tlawng lei siam chu a lo pamṭul tawh avang leh a chim avangin nunna chân hial an lo awm tawh a, chutiang thleng lo tur chuan theihtawp chhuah turin hnathawktute chu a chah bawk a ni.

Tlawng Lei siam mek hi Poddar Infotech Pvt. Ltd. in an thawk a, kum 2021 March thla aṭang khan hna hi thawh ṭan a ni a, tun dinhmunah zaa 25 vel hna zawh tawh niin March 2023 a zawh hman tura tih a ni a. Company lam chuan an inremnaa hna zawh hun a tih hmaa hna thawhzawh an tum a ni. Tlawng lei siamna tur hian cheng vbc. 36.99 ruahman a ni.

Tun dinhmunah NH44A/108 siam mek hi Dapchhuah aṭanga Dampui peng thleng km 6 vel black top loh a la awm a, Darlak leh Tuidam inkar Km 4 vel siam loh la awm bawkin, Teirei Lei dawh tur a la awm bawk a ni.