Covid-19 hri kaite hri kai eng chi (variant) ber nge tih hriat theihna atana Zoram Medical College (ZMC)-a Genome Sequencing tihna khawl chu tun thlengin hman ṭangkai theih a la ni lo.
ZMC hotute sawi danin Genome Sequencing tihna khawl hi nikum October ni 27 khan Health Minister Dr R.Lalthangliana’n ZMC-ah a hawng a, enchhinna (trial run) vawi engemawzat an neih hnuah a tir aṭangin a khawl hi a chiang thei lo a, a khawl rawn buntute ko chho tura vawi tam tak an beih hnuah pawh harsatna an neih avangin tun thlengin an lo chho thei rih lo niin an sawi. Mizorama hri lêng mek hi eng chi (variant) nge tam ber tihte endik a ṭul an tih thu leh, ti thei lova an awm chu hrehawm an tih thu an sawi bawk a ni.
Hetihlai hian National Insitute of Bio-medical Genome (NIBMG), Kolkata-a eng Covid-19 hri ber nge tih endik atana sample 319 thawn thlak result chu nimin thleng khan hriat theih a la ni lo a, Health department hotute chuan hetianga result hriat tlai a nih chhan hi an endikna laboratory-a thawk engemawzatin hri an kai vang niin an sawi a, endikna result hi hriat theih la ni lo mahse, Coronavirus zinga inkaichhawn awlsam ber nia mithiamte’n an sawi ‘Omicron variant’ chu Mizo-ramah a darh ve tawha an rin thu mithiamte’n an sawi a. Tun hnaia Covid-19 vânga nunna chân tam ber chu Aizawl khaw pâwn an nih avangin thihpui tam ber Delta variant chuan Mizoram thing-tlang lam a la châmchilh nia ngaih a nih thu an sawi bawk.