Zothlifim Logo
Loading ...

MIMA Executive meeting chuan, AMC Licensing Regulations, 2012 chu ngun taka an zirchian leh an enho hnuah Mizo Hnam himna tura siamṭhat pakhatmah a la awm lo, an ti.

Licensing Regulations, 2012-in a phut ṭhin chu, tun dinhmunah pawh Epic, Residential Certificate, building neitu phalna, passport size photo 4 copies leh Local Council aṭanga NOC an phut chu a hma lama mi nen a ngai reng. Heng document-te hi Hnamdang tan neih harsa pakhat mah a awm lo a, Epic leh Residential Certificate-te hi Mizoram tih a ni si lova, India rama State dang khawi hmun pawh a hman theih vek a ni, an ti.

MIMA chuan COVID-19 hri len hmaa MIMA-in a check-naah pawh hnam dang tam tak AMC-ah hian an in-register tawh a ni tih a hmu chhuak a. Hetiang a nih avang hian AMC-a sumdawngte in-register chung-changah hian MIMA chu a dinna ngaiah a la ding reng a, sumdawngte AMC-ah hian Registration tih rih loh tur a ni, an ti.

Mizo hnam himna turin AMC pawhin Registration ti tur hian sumdawngte mi tilui lo turin MIMA chuan a ngen nghal bawk a, tih luih tir tumna a awm anih chuan MIMA hotute hriattir vat ni se an ti.

Mizo hnam himna a awm loh lai hian Bank ṭhenkhata loan lâk dawn leh department ṭhenkhat thil pawimawh tih dawnin AMC Registration certificate phût an la awm tih hriat a ni a. Hengho pawh hian phût tawh lo turin MIMA chuan a ngen, an ti a, phût lui an awm chuan Chanchinbua an hming chhuah a nih tur thu leh MIMA chuan a theih angin hma an lâk tur thu an sawi bawk a ni.