Nimin khan Serchhip NGO Coordination Committee huaihawtin Bukpui rama Serchhip District Hospital building thar sak a nih ngei theih nana hmalak dan tur chungchang sawiho a ni.
Nimina Serchhip Sub-Hqrs. YMA Meeting Room-a ṭhutkhawm hi Serchhip NGOCC Chairman Kawlṭhuama’n kaihruaiin NGOCC Secretary PC Vanlalluna chuan Serchhip District Hospital building thar sakna hmun tur thlan chungchanga thil lo kal tawh dan sawiin, District Bawrhsap kalchhuak ta Kumar Abhishek khan NGO Coordination Committee-te a sakna hmun thlan tura a tih angin tlawm-ngai pawl leh Joint VC bakah, Town chhunga VC aiawhte chu September ni 16, 2020-ah inhmukhawmin District Hospital building thar sakna atana Bukpui ram chu lungrual taka an thlan thu a sawi a, hetihlai hian CSR Fund cheng vbc. 21 vel hmuh mai tura beisei a nih tawh laia Assembly House-ah a hmun tur chianglo anga sawi a awm leh tak avanga hmalak dan tur ngaihtuah tura tun ṭuma inhmuhkhawm chu koh a ni tih sawiin, ṭhutkhawm hma-sain a hmun tura an lo thlan tawh chu an dinna leh Hospital sakna atana an thlan a la ni reng tih a sawi bawk.
Nimina ṭhutkhawm-naah hian Chhiahtlang South VC aiawhte leh Serchhip Ṭhalai Pawl aiawhte chu tel ve turin a bik taka sawm an ni a, Chhiahtlang South VCP R.Lalremchhunga chuan Hospital sakna tura lo rawt tawh ram chu P&E Department ram a ni lo tih sawiin, a ram chung-changah harsatna awm lo tura an ngaih thu a sawi a. Serchhip Ṭhalai Pawl President Laldinpuia pawhin SṬP chuan District Hospital sakna atana hma an lo lak tawhnate sawiin, Hospital sakna hmun atan thlan bik an neih loh thu leh khawtlang hruaitu VC leh NGO hrang hrangten an lo thlan tawh Bukpui ram chu an thlawp thu a sawi bawk.
He meeting-ah hian NGOCC-a tel, pawl hrang hrang YMA, MHIP, MUP, MSU leh MZP aiawhte telin, Serchhip District Hospital sakna tur chungchang-ah hian P&E Department chuan he lai ram neitu nia an inchhal avangin Assembly Session zawhah P&E Minister chu hmaichhana hmuh leh, hemi chungchang hi a hnena ziaka thlen nise an ti a, helai rama compensation lak tum an awm nia sawi chungchangah District Bawrhsap chu kawm nise an ti bawk.