Serchhip Ṭhalai Pawl (SṬP)-in Serchhip Auditorium leh a chhunga bungraw tihchhiat chungchanga FIR an thehluh hnua boruak kal zelah nimin khan Lalthang-hliri Pautu, DUDO, Serchhip chuan a office-ah SṬP, Ser-chhip Sub-Hqrs. YMA, Field Veng Branch YMA leh Serchhip Town Jt. VC hruai-tute chu Serchhip Auditorium chungchang a sawipui.

He sawihonaah hian DUDO chuan Auditorium chungchanga thil pawi lo thleng tawh chu a thleng tawh a ni a, a chhiat belh zel lohna tura hmalak dan tur chungchang sawiho a duh thu a sawiin, Serchhip Auditorium leh Stadium enkawltu tur Management Committee chu DC kaihhruaina hnuaia din a ni tih sawiin, he committee hi ṭhutkhawm thuai a beisei thu a sawi.

Serchhip Auditorium chu nikum December thla khan UD&PA Jt. Director pawhin a hmunah a tlawh tawh a, hemi bawhzui hian kumin January thla khan DUDO chuan a hmunah kalchilha enfiahin, heta a thil hmuh dan report chu District Disaster Management Authority-ah a thehlut tawh a, report a thehluhah hian Auditorium khawih chhiat a nih bakah a sakna hmun lei a ngheh loh thu mipuiin an sawi dante pawh a ziak lang tih a sawi a, a lei ngheh leh ngheh loh dante endik a ṭul thu leh, a lei a nghet a, a him ṭha a nih chuan a thawm ṭhatna tur atan pawh ruahmanna siam a theih ang a, a hmunhma a him lo a nih chuan thawm ṭhatin awmzia a awm lo ve thei bawk tih a sawi a, amaherawhchu DDMA aṭangin chhânna an la dawng lo tih a sawi.

Nimina kal khawmte chuan Auditorium chhunga bungraw tihchhiat bakah a chung far nasa chuan thil tam tak a tichhia tih an sawi a, a thawm ṭhat hna chu rang taka thawh thuai an duh thu an sawi a, hetihlai hian a thawm ṭhat hna thawh hmaa a chhe zel tur vên hna thawh chu thil pawimawh hmasa nia an hriat thu sawiin, a enkawltu tur dah turin ruahmanna an siam nghal a, Audirorium pawh a theih ang anga mipui hman theiha siam leh thuai a nih theih nan thawm ṭhat ngai zualpuite thawm ṭhat dan ngaihtuah nise an ti a, a tihfai hna nen Sub-Hqrs. YMA kaihhruainain Inrinni khian hnatlang neih nise an ti bawk.

Inkawmhonaa an neih hnu hian DUDO ho hian Auditorium chu a hmunah an enfiah nghal a, SṬP hruaitute hi an president T.Biakchamliana’n a ho a, Sub-Hqrs. YMA aiawhin an president R.Kawlṭhuama leh a thawhpuite kalin, Field Veng Branch YMA president V.Lalrintluanga leh a thawhpuite bakah Joint VC president V.Tlangṭhuama leh Jt. VC Secretary-te an tel bawk a ni.